Ямар ч зодоон ердөө 3-5 минутын хооронд л болж өнгөрдгийг мэргэжлийнхэн тогтоосон байдаг

           Ид хийж бүтээх насан дээрээ залуус гэмт хэрэг үйлдэж, олон жилийн эрх чөлөөгөө хасуулдаг. Тэр тусмаа залуус хүн амины хэрэг үйлдэж, 15-20 жилийн хорих ялаар шийтгүүлж буй гэмт хэрэг жил ирэх тусам өсч байгаа нь харамсалтай. Тэдний ноцтой хэрэг үйлдсэн шалтгаан нь ердөө л хэдхэн минутын дүрэлзсэн их уур, омог, хийж байгаа үйлдлээ хянаж чадаагүйгээс болсон байдаг. Залуус найз нөхөдтэйгөө нийлж архи, согтууруулах ундаа хэрэглэж, баар цэнгээнийн газар ордог. Ингэхдээ хэн нэгэнтэй ялихгүй зүйлээс болж маргалдан улмаар зодолддог. Ямар ч зодоон ердөө 3-5 минутын хооронд л болж өнгөрдгийг мэргэжлийнхэн тогтоосон байдаг. Гурван минутын уур хилэнгээ барьж дийлээгүйгээс хүн амины хэрэгтэн болж, амьдралдаа хэзээ ч арилшгүй хар толботой болж үлддэг.

Залуус найз нөхдөө харж онгирч, хэт дэрвэх, мөн хэдхэн минутын дүрэлзсэн их уур, омгоо дараад сурчихвал өөрийнхөө эрх чөлөөг болоод бусдын аз жаргалыг ч бүрэн хамгаалж, хадгалж үлдэх юм шүү

         Мөн ид хийж бүтээх, хайрлаж дурлаж, эхнэр, үр хүүхэдтэй болох хугацаагаа төмөр торны цаана өнгөрүүлэх болдог. Гэмт хэрэгтэн болж эрх чөлөөгөө хасуулсан залуусын олонх нь “Талийгаач намайг янз бүрээр хэлж, доромжилсон. Үүнээс болоод гэнэт уур хүрч, зодолдож эхэлсэн. Маш богинохон хугацаанд бүх зүйл болоод өнгөрсөн” хэмээн мэдүүлэг өгсөн байдаг. Хууль зүйн үндэсний хүрээлэнгээс хүний амь насыг хөнөөсөн мянга орчим гэмт хэрэгтнээс судалгаа авсан байна лээ. Судалгаанд хамрагдсан хоригдлуудын 90 гаруй хувь нь хэдхэн минутын уур хилэнгээ тэсвэрлэж чадаагүйгээс болж хүний амь нас хөнөөсөн талаараа ярьсан байна.

         Саяхан гэхэд цэргийн баяр тэмдэглэж явсан найзууд хоорондоо зодолдож байгаад нэгнийхээ амь насыг хөнөөсөн хэрэг Сүхбаатар дүүрэгт гарсан. Гэмт этгээд уураа барьж дийлээгүйгээс болоод талийгаачийг ширээний тавцангаар цохиж аминд нь хүрсэн байдаг. Энэ мэт хоромхон зуурын уураасаа болж олон мянган залуус гэмт хэрэгтэн болж байна. Тиймээс ялангуяа залуус найз нөхдөө харж онгирч, хэт дэрвэх, мөн хэдхэн минутын дүрэлзсэн их уур, омгоо дараад сурчихвал өөрийнхөө эрх чөлөөг болоод бусдын аз жаргалыг ч бүрэн хамгаалж, хадгалж үлдэх юм шүү.

Гурван минутын уур хилэнгээ барьж дийлээгүйгээс хүн амины хэрэгтэн болж, амьдралдаа хэзээ ч арилшгүй хар толботой болж үлддэг