Тэр бөхийн нэр хэн бэ гэж хуйларч унадаг байлаа, монголчууд. Гэтэл одоо допингтой бөхийн нэр бэ гэж уурсаж, бухимддаг боллоо. Жил жилийн наадам сайхан болсон эсэх нь биднээс биш, бөхчүүдээс хамаардаг болоод удлаа. Төв цэнгэлдэхэд цугласан монголчуудыг өндөлзүүлж, нутаг усаар нь талцуулж, давчихаад сэргээшийн шинжилгээнд бүдэрдэг бөхчүүдийн тоо олширч байна. Энэ жил ч мөн ялгаагүй дөрвөн бөхийн шинжилгээний хариуг дахин шинжлэх шаардлагатай болж, монголчуудыг эрэлд гаргаад байна. Амтай болгон л талцаж, допингтой бөхийн нэрийг таах гэж оролдож байна.

            Тодруулбал, баяр наадамд шөвгөрсөн 32 бөхийн допингийн шинжилгээний хариуг өчигдөр зарлалаа.

Албаныхан “Үндэсний бөхийн салбар хороо хуулийн дагуу баяр наадам зохион байгуулж дуусгасан. Дөрвөөс дээш давсан бөх болон сурын харвааны 48 тамирчнаас допингийн эсрэг шинжилгээ авсан. Түүнээс дөрвөн сорьцын хариу ирээгүй байна. Харин 44 сорьцын хариу ирсэн. Дөрвөн шинжилгээний хариу эерэг гарсан нь допинг илэрсэн гэсэн үг биш. Дахин шинжилгээ хийх шаардлагатай гэсэн үг. Мэргэжлийн байгууллага шинжилгээг эцсийн байдлаар эргэлзээгүйгээр гаргах ёстой. Нэмэлт шинжилгээ 14-21 хоногийн дараа гарна. Гэхдээ бид яаралтай хариу гаргаж өгөхийг шинжилгээний байгууллагад хэлсэн. Хэрвээ допинг илэрсэн нь тогтоогдсон тохиолдолд тухайн тамирчинд мэдэгдсэний дараа нэрсийг зарлана. Шинжилгээний хариу кодоор ирдэг учир бүгд ямар тамирчны шинжилгээг дахин шинжлэх шаардлагатай болсныг бид мэдэхгүй. Монголын өв соёлыг тээдэг үндэсний бөхийг олон улсад хориглодог допингоос ангид байлгах хэрэгтэй. Олон улсын дүрмийн дагуу явуулахаар ажиллаж байгаа” гэв.

Хамгийн багадаа 14 хоног допингийн хэрүүл үргэлжилнэ гэсэн үг. Тэгээд дараа нь, сэргээшийн төрлийн бодис илэрсэн бөхчүүд “Миний шээсийг сольсон, солиогүй. Худлаа мэдээлэл, нэр төрөө сэргээлгэнэ. Допингийн бүлэглэлд цавчууллаа” гэх мэдээллийг намаржин хийнэ. Магадгүй ирэх жилийн наадмын босго хүртэл энэ маргаан үргэлжилнэ.

ДӨРӨВ ДАВЖ, ДОПИНГИЙН ШИНЖИЛГЭЭ ӨГСӨН 32 БӨХ

          Үндэсний их баяр наадмаар дөрөв давсан бөхчүүдээс шинжилгээ авдаг болсон. Даян аварга Н.Батсуурь, аварга Г.Эрхэмбаяр, П.Бүрэнтөгс, О.Хангай, арслан Б.Орхонбаяр, гарди Б.Гончигдамба, заан Б.Пүрэвсайхан, Д.Анар, Б.Бат-Өлзий, М.Лхагвагэрэл, харцаг Б.Зоригтбаатар, Х.Гантулга, Г.Ганхуяг тэргүүтэй 32 бөх шинжилгээ өгсөн юм. Эдгээр бөхийн дөрвийнх нь шинжилгээ эргэлзээтэй гарсан гэсэн үг.

 Одоогийн байдлаар дээрх 32 бөхийн хэнд ч шинжилгээний хариуг өгөөгүй байгаа. Шинжилгээний хариу асуудалгүй гарсан 28 бөхөд хариуг илгээж болох ч хувь хүнээс нууцыг хамгаалах үүднээс ийм арга хэмжээ аваад байгаа ажээ.

Ийм учраас бид шинжилгээ өгсөн 32 бөхийн заримтай нь холбогдож, дараах мэдээллийг авлаа.

УЛСЫН ЗААН Д.ХҮДЭРБУЛГА: 20 ГАРУЙ УДАА ӨГСӨН ШИНЖИЛГЭЭНИЙ ХАРИУНДАА ИТГЭЛТЭЙ БАЙНА

        Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойн Үндэсний их баяр наадмын бөхийн барилдааны долоогийн даваанд Төв аймгийн Өндөрширээт сумын харьяат улсын начин Д.Хүдэрбулга Ховд аймгийн харьяат улсын аварга О.Хангайг өвдөг шороодуулж, Монгол Улсын заан цолны болзол хангасан билээ. Тэрбээр наймын даваанд дархан аварга Н.Батсуурьд өвдөг шороодсон юм.

Улсын заан Д.Хүдэрбулга “Баяр наадмын дараа нутагтаа ирлээ. Одоогоор сумандаа гэр бүлийнхэнтэйгээ амарч байна. Би допингийн шинжилгээг 20 гаруй удаа өгсөн. Шинжилгээнийхээ хариунд эргэлзэх зүйл байхгүй. Итгэлтэй байна” гэлээ.

УЛСЫН ЗААН Б.БАТ-ӨЛЗИЙ: ШИНЖИЛДЭГ ГАЗАР НЬ ТОГТООНО

       Жил болгоны наадмаар улсын заан Б.Бат-Өлзийг түрүүлэх болов уу гэж монголчууд хүлээдэг. Энэ жилийн хувьд Б.Бат-Өлзий заан тавын даваанд Завхан аймгийн харьяат М.Амарсанаад өвдөг шороодсон билээ.

Улсын заан Б.Бат-Өлзий “Допингийн шинжилгээ авсан газар нь зарлах байх. Шинжилдэг газар нь тогтооно. Одоогоор надад мэдэж байгаа зүйл алга” гэв.

УЛСЫН ЗААН Б.ПҮРЭВСАЙХАН: ХӨЛӨНДӨӨ ГЭМТЭЛ АВЛАА

       Улсын заан Б.Пүрэвсайхан тавын даваанд Өмнөговь аймгийн арслан М.Буяндэлгэртэй барилдаж, хүнд бэртсэн билээ. Тэрбээр тавын даваанд М.Буяндэлгэрт тахимаа өгсөн ч хөлийн цэц М.Буяндэлгэрийг унасанд тооцсон юм. Б.Пүрэвсайхан заан цэнгэлдэхийн зүлэг ногоон дэвжээг орхиж, эмнэлэгт хүргэгдсэн билээ.

Түүнтэй холбогдож тодруулахад “Хөлөндөө гэмтэл авсан. Гэхдээ бэртэл маань харьцангуй гайгүй байна. Ийм учраас санаа зовох зүйлгүй. Шинжилгээний хариу асуудалгүй” гэв.

УЛСЫН ХАРЦАГА Б.ЗОРИГТБААТАР: УНАСАН Ч ГЭСЭН ХОЁР ЖИЛ ДАРААЛАН ШИНЖИЛГЭЭ ӨГЛӨӨ

         Улсын харцага Б.Зоригтбаатар энэ жил өнгөтэй байсан. Ийм ч учраас наадамчин олон түүнийг дээгүүр даваанд барилдана гэж хүлээж байлаа. Харамсалтай нь, түүний нурууны бэртэл сэдэрсэн учраас тавын даваанд Э.Мөнхжаргалыг амлан авч, тахимаа өгсөн билээ.

Б.Зоригтбаатар “Нурууны бэртэл маань эдгэрч байгаа. Наадмаас хойш нутагтаа амарч, биеэ тордож байна. Унасан гэлтгүй би хоёр жил дараалан шинжилгээ өгч байгаа. Ийм учраас шинжилгээний хариунд эргэлзэх зүйлгүй. Юунд нь эргэлзэх вэ дээ” гэлээ.

УЛСЫН ХАРЦАГА Г.ГАНХУЯГ: НАДАД АСУУДАЛ, АЙХ ЗҮЙЛ БАЙХГҮЙ

        Өнгөрсөн  жилийн наадмаар Ховд аймгийн Булган сумын харьяат, чөлөөт бөхийн Үндэсний шигшээ багийн тамирчин, Ази тивийн аварга шалгаруулах тэмцээний хүрэл медальт, ОУХМ  Г. Ганхуяг сайн барилдаж, улсын харцага цолны болзол хангасан билээ. 170 см хүрэхгүй шахам жижиг биетэй тэрбээр улсын том цолтнуудыг ээлж дараалан "нураасан". Нэгийн даваанд Б.Гончигсүрэнг, хоёрын даваанд улсын начин Н.Мустафаг, гурвын даваанд улсын харцага Н.Батзаяаг давсан. Дөрвийн даваанд улсын аварга П.Бүрэнтөгсийг, тавын даваанд улсын гарьд Ө.Бат-Оршихыг, зургаагийн даваанд улсын арслан Б.Орхонбаярыг давж, улсын начин цолыг алгасан улсын харцага цолтон болсон билээ. Тэгвэл тэрбээр энэ жилийн наадмаар ч сайн барилдаж, харцага цолоо дахин баталлаа. Энэ жилийн тухайд, зургаагийн даваанд өнгөрсөн жилийн учраа улсын арслан Б.Орхонбаяртай таарч, өвдөг шороодсон юм.

Улсын харцага Г.Ганхуяг “Сүүлийн хоёр жилийн хугацаанд тоймгүй олон допингийн шинжилгээ өгсөн. Тоогоо алдсан шүү дээ. Дэлхийн бөхийн холбоо, самба, чөлөөтийн холбооноос тогтмол шинжилгээ өгүүлдэг. Олон улсын чанартай тэмцээн, уралдаан оролцох болгондоо л шинжилгээ өгдөг. Надад бол асуудал, айх зүйл байхгүй” гэв.

УЛСЫН НАЧИН Э.МӨНХЖАРГАЛ: ДОПИНГИЙН ХАРИУНД ЭРГЭЛЗЭХ ШАЛТГААН БАЙХГҮЙ

        Архангай аймгийн Хотонт сумын харьяат, аймгийн арслан Э.Мөнхжаргал улсын харцага Б.Зоригтбаатараар тав давж, улсын начин цолны болзол хангасан. Аавыгаа даган бөх барилдаж эхлээд 20 гаруйхан настай залуу аймгийн заан цолны болзол хангаж байлаа. Ийн энэ жил улсын цолны босго давсан юм.

Улсын начин Э.Мөнхжаргал “Допингийн шинжилгээг дөрвөн удаа өглөө. Шинжилгээний хариунд эргэлзэхгүй байна. Эргэлзэх шалтгаан байхгүй. Одоогийн байдлаар албаныхан холбогдож, шинжилгээний хариуг хэлээгүй байна. Хэсэгтээ хэлэхгүй юм шиг байна лээ. Би сумандаа гэр бүлийнхэнтэйгээ амарч байна. Удахгүй Улаанбаатар орж, бэлтгэлдээ орно” гэлээ.

Бид үргэлжлүүлэн бөхчүүдээс тодруулан хүргэх болно.