Байгаль орчин, аялал жуулчлалын яамны Төрийн нарийн бичгийн дарга Э.Баттулгыг ажлаас нь чөлөөлөх асуудал яригдаж эхэлжээ. Тодруулбал, Б.Бат-Эрдэнэ сайд ТНБД Э.Баттулгатай хамтарч ажиллаж чадахгүй хэмээн Засгийн газарт хандаж, өргөдөл, гомдол өгөөд байгаа гэнэ.

Энэ талаар Байгаль орчин, аялал жуулчлалын яамны Төрийн нарийн бичгийн дарга Э.Баттулгатай холбогдож, тодрууллаа.

Тэрбээр “Албан ёсоор үүрэгт ажлаас нь чөлөөлсөн гэх өргөдөл, мэдээлэл аваагүй байна. Одоохондоо энэ талаар сайн мэдэхгүй байна. Б.Бат-Эрдэнэ сайдтай хамтарч ажиллаж чадаж байгаа эсэхийг сайдаас асуух нь зүйтэй болов уу. Би хууль, журмынхаа дагуу л үүрэгт ажлаа гүйцэтгэж байгаа. Зохих шаардлагаа тавиад, ажиллаж байна. Бидэнд хувь хүний харилцаа, үл ойлголцол байхгүй. Улсын ажилтай холбоотой асуудал байгаа. Ажил явж байгаа учраас асуудал гарна шүү дээ” гэлээ.