Нийслэлийн Прокурорын газраас ирүүлсэн саналын дагуу яллагдагч О.Мөнхжинд Монгол Улсын хилээр гарахыг хязгаарлах таслан сэргийлэх арга хэмжээг авсан байдаг. Үүнийг өөрчилж, цагдан хорих таслан сэргийлэх арга хэмжээ авахуулах тухай саналыг прокуророос өчигдөр хүргүүлжээ. Шүүх хуралдаанаар саналыг хянаж үзэхэд яллагдагч О.Мөнхжинд эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1.3 дахь хэсэгт заасан “Гэмт хэрэг үйлдэж болзошгүй үндэслэл бүхий баримт, мэдээлэл байгаа” гэдэг үндэслэл хэргийн нотлох баримтуудаар тогтоогдсон байдаг. Иймд яллагдагч О.Мөнхжинд энэ сарын 6-ны өдөр авсан Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээг өөрчилж, энэ сарын 14-ны өдрөөс эхлэн 1 сарын хугацаагаар цагдан хорих таслан сэргийлэх арга хэмжээ авч шийдвэрлэжээ.

30 хоног цагдан хоригдоод байгаа О.Мөнхжингийн хамтрагч нартайгаа ярилцаж буй чат бичлэгийг хууль хяналтын байгууллагынхан дэлгэж эхэлжээ.

Тодруулбал, "IHC" койныг зах зээлд нэвтрүүлсэн О.Мөнхжин, Б.Гантиг, Б.Эрхэмбаярын харилцан ярианд дараах яриа бичигджээ.

О.Мөнхжин: Биднийг гурвууланг нь гадагшаа гараад явчихсан байна. Хэзээ ч гадагшаа явдаггүй Б.Эрхэмбаяр нь хүртэл явчихсан байна гэвэл хүмүүсийн итгэлийг алдах байх. Хэдүүлэнд ер нь айх юм юу байгаа билээ. Хүмүүстэй хэрүүл хийхгүйгээр нээлттэй байдлаар харилцаж, явбал яадаг юм бэ. Мэдээллүүдээ өгөөд, ярилцаад явбал зүгээр биш үү. Надад ийм санал байна. Гурвуулаа гадагшаа явахаар  хамгийн үнэ цэнтэй гээд байгаа хүмүүсийнхээ итгэлийг алдчихвал дараа нь хэцүү цаг ирэхэд биднийг өмөөрөх хүн байхгүй болох вий дээ гэж санаа зовж байна” хэмээн ярьжээ.