Ерөнхий сайд Л.Оюун-Эрдэнэ БНСУ-д айлчилж буй. Энэ үеэр тус улсад ажиллаж, амьдарч буй иргэдтэй уулзалт хийж, иргэд байр сууриа илэрхийллээ.

ИРГЭН: Би өнгөрсөн долдугаар сарын 3-нд долоон сартай Цэрэнлхам охиноо аваад Солонгос Улсад ирсэн. Миний охиныг ургийн гажигтай, хоёрхон хоногийн настай гэж ЭХЭМҮТ-ийн төвөөс цогцсыг нь аваарай гэхээс холгүй зүйл хэлж байлаа. Би зүтгэсээр байгаад энд ирсэн. Манай улсад ийм төрлийн саажилттай 140 мянган хүүхэд бий. Үндсэн хуулийн 3.4, 1.7 дугаар зүйлд заасан байдаг. Эхийн хэвлийгээс ураг төрөхөд төр өөрөө хариуцна гэж. Монгол Улс таны ярьж байгаа шиг хөгжих болоогүй, сайд аа. Үнэнээ хэлэхэд бүх зүйл дорой байна. Би өвлийн хүйтэнд хөлдсөн ч хамаагүй гээд гадаа зогсож байгаад хүүхдийнхээ эмчилгээг хийлгэдэг байсан. Миний хүүхэд өнөөдөр "Ааваа" гэж хэлж чаддаг болсон. "Хүүхдийнхээ шарилыг аваарай" гэж миний нүдэн дээр доромжилж байсан бол би өнөөдөр хүүхдээ эмчлүүлж чадсан.  Миний нүдэн дээр 92 саажилттай хүүхэд сэхээн амьдруулах тасагт амиа алдсан. Энэ чигээрээ явбал манай улс 2050 онд эрүүл хүүхэдгүй болно. Саажилттай, донтолттой хүүхэд олон байна. Түүний ард төдий чинээ эцэг, эх шаналж байна. Өнөөдөр бидэнд хэн тусалдаг вэ. Сүмийнхэн тэр хүмүүст үнэгүй хоол өгч туслаж байна. Би Үндсэн хуульдаа захирагдна гээд асуудал гарвал Элчин сайд дээрээ яваад очдог.  Гэтэл ингэж чадахгүй олон хүн байна. Хэлгүй, дүлий, 55 настай хүн энд ажил хийх гээд ирсэн. Нэг л өдөр элэг нь задарч байна. Тэгэхэд нь би консулд хандаад элэгний хавдар нь тавдугаар шатандаа орсон хүний зардлыг нь даагаад эх оронд хүргэх хүсэлт гаргаж байлаа. 

ИРГЭН: 50 мянган гаруй иргэн Солонгос Улсад ажиллаж амьдарч байна. Гэтэл элчин сайдын яам нь сумын хэмжээнд хүрэхгүй хүний нөөцтэй. Тэгэхээр яаж энэ олон хүний асуудлыг шийдэх вэ. Солонгост олон монголчууд ажиллахаар ирдэг болсон. Гэрээгээр ажиллахаар ирсэн залуусын амьдрах нөхцөл маш хэцүү, хүнд. Монгол оюутнууд олноороо сурч байна. Гэтэл оюутнуудыг ажиллуулах цаг нь бага. Хоёрхон цаг ажиллаад хоногийн хоолоо яаж олох юм бэ.

Хоёрдугаар асуудал нь онгоцны зардлын асуудал маш хүнд байна. МИАТ уг нь Төрийн өмчит компани биз дээ. Гэтэл Монголтой яг ижилхэн газар онгоцны нислэгийн зардал нь манайхаас 20-30 хувь хямд байна. МИАТ-ыг дагаад хувийн компаниуд нислэгийн зардлаа нэмдэг. Ийм өндөр зардалтай байхад юун аялал жуулчлал. Онгоцны зардлаасаа болоод харлаж байгаа хүмүүс ч бий шүү.

Бид ч гэсэн монголдоо сайхан амьдармаар байна. Та нар өнөөдөр "За" гэчихээд маргааш алга болдог. Өнгөрсөн хугацаанд танай намынхан юу хийсэн бэ. Авлига, хээл хахуулиа арилгаж чадахгүй бол биднийг сонгоод өг гэж битгий гуйгаарай. Гадаад байгаа хүмүүс бүгд сонгууль өгдөг болмоор байна.