IHC койны хэрэгт холбогдуулан тус токеныг гаргасан “Их Бит” ХХК-ийн үүсгэн байгуулагч О.Мөнхжинг цагдаагийн байгууллагаас шалгаж, гэр, ажлын байранд нь нэгжлэг хийж байгаа. Мөн тус хэрэгт холбогдуулан “Их Бит” ХХК-ийг үүсгэн байгуулагч Б.Эрхэмбаяр, Б.Гантиг, Б.Идэр-Од нарыг холбогдуулан шалгаж байгаа юм. Харин үүсгэн байгуулагч, комедиан Б.Идэр-Од өнгөрсөн 2022 оны зургадугаар сард өөрийн эзэмшдэг бүх хувьцаанаасаа татгалзаж, гадаад руу гарсан байдаг.

                             О.Мөнхжин, Б.Эрхэмбаяр, Б.Гантиг, Б.Идэр-Од нарын үүсгэн байгуулсан “Их Бит” ХХК-иас гаргасан Inflation Hedging Coin буюу IHC токен анх дотоодын дөрвөн биржид 100 тэрбум ширхэг койн гаргасан. Улмаар эхний ээлжид задалсан койн анхдагч зах зээлд минут хүрэхгүй хугацаанд 30 тэрбум төгрөг татан төвлөрүүлж, дотоодын дижитал хөрөнгийн дээд амжилт тогтоогоод байв. Тэгвэл өнөөдөр иргэд IHC койнд их хэмжээний хөрөнгө оруулалт хийж, хохирсон талаар мэдээлэл хийсэн. Цаг үеийн нөхцөл байдалтай холбоотойгоор IHC токены хувьцаа эзэмшигчдийг танилцуулж байна.

-IHC КОЙНЫ ХУВЬЦАА ЭЗЭМШИГЧИД-

“IHBIT Global” компанийн үүсгэн байгуулагч, гүйцэтгэх захирал Б.ГАНТИГ

Б.Гантиг нь Монголын Финтек, Блокчейн холбооны дарга, Хятадын “VeChain” компанийн Монгол дахь суурин төлөөлөгч, “Silkchain Capital” компанийн үүсгэн байгуулагч, “Complex.mn” дижитал хөрөнгийн биржийн үүсгэн байгуулагч, “Bittrex” дижитал хөрөнгийн биржийн хувьцаа эзэмшигч. Тэрбээр 2021 оны наймдугаар сард Монголын анхны виртуал хөрөнгийн зохицуулалтыг боловсруулах Ажлын хэсгийн гишүүн болсон. Б.Гантиг нь 2009-2017 онд “Оюутолгой” компанийн логистикийн ахлагч, экспортын үйл ажиллагааны ахлагч, стратегийн төслийн мэргэжилтнээр ажиллаж байжээ. 2017 онд Монголын анхны дижитал хөрөнгийн бирж Trade.mn ажиллаж эхэлснээс хойш Б.Гантиг хоёр сарын дотор тав гаруй сая ам.долларын ашиг олсон аж.

“IHBIT Global” компанийн Худалдаа, эрсдэл хариуцсан захирал Б.ЭРХЭМБАЯР

Б.Эрхэмбаяр нь 2008 онд дууны инженерээр ажиллаж байхдаа хөрөнгийн зах зээлд суралцан арилжаа хийж эхэлсэн. Өдгөө тэрбээр дижитал хөрөнгийн зах зээлд гойд амжилттай яваа бөгөөд криптовалютад хөрөнгө оруулагчдын “Swing Traders” онлайн нийгэмлэгийг удирддаг гэнэ. Мөн өөрийн цахим сүлжээгээр дамжуулан хүмүүст хөрөнгийн зах зээлийн талаар үнэгүй сургалт, курс явуулдаг юм байна.

“IHBIT Global” компанийн ерөнхий захирал Б.МӨНХ-ЭРДЭНЭ

Б.Мөнх-Эрдэнэ нь 2008 онд “Изинис Эйрвэйс” ХХК-д мэдээллийн технологийн мэргэжилтэн, 2010 онд “Мобиком” ХХК-д программист, 2012 онд “Интерактив” ХХК-д иргэний бүртгэлийн системийг кодлох ажил хийж байжээ. Улмаар тэрбээр “Интерактив” ХХК-ийн ерөнхий захирал болж, Засгийн газраас төсөл авч, хэрэгжүүлж байсан аж. Мөн Б.Мөнх-Эрдэнэ нь дижитал хөрөнгийн Trade.mn, бичил зээлийн Zeel.mn сайтыг бүтээхэд хамтран ажиллаж байжээ. Хамгийн сүүлд тэрбээр Ард санхүүгийн нэгдэлтэй хамтран дижитал хөрөнгийн DAX.mn сайтын арын хэсгийг боловсруулсан байдаг.

“IHBIT Global” компанийн Бизнесийн хөгжил, маркетинг хариуцсан ерөнхий захирал Х.МӨНХБИЛЭГ

Х.Мөнхбилэг нь 2009 онд “М-Си-Эс Проперти” ХХК-д маркетингийн ахлах менежер, борлуулалтын менежерээр ажиллаж байгаад 2011 оноос “Гоёо” ХХК-ийн захирал болсон байдаг. Тэрбээр “Алтай Холдинг Групп” ХХК болон Shark Tank Mongolia телевизийн шоуны бизнес, маркетингийн стратеги, сурталчилгаа, контент үйлдвэрлэлийн зөвлөхөөрөө ажиллаж байжээ. Мөн “Sky Resort Housing”, “Bella Vista”, “Viva city” төсөл, АНУ-ын Бремертон хотын далайн эрэг дээр баригдах 60 байшингийн төсөл, цахим худалдааны “Amazon”, “eBay”-ын төсөл оролцож байсан аж.

                                Дээрх таван захирлаас гадна өөр хоёр хүн IHC койны хувьцааг эзэмшдэг бөгөөд “IHBIT Global” компанийн хамтран үүсгэн байгуулагч, гадаадын иргэн Стивен Чен, Дэйв Ли нар байдаг юм байна.