Үнийн өсөлтийг эсэргүүцэн жагссан залуус Сүхбаатарын талбайд хоёр дахь өдрөө жагсаж байна. Ерөнхий сайд Л.Оюун-Эрдэнэ, Хууль зүй, дотоод хэргийн сайд Х.Нямбаатар нар төв талбайд гарч ирж, жагсагчидтай уулзсан билээ. Тэгвэл уг жагсаалыг шууд дамжуулж байгаа хэвлэл мэдээллийн хэрэгслийн төхөөрөмжид гацалт үүсэж, сүлжээ унаж байгаа тул мэдээллийг цаг алдалгүй хүргэхэд бэрхшээл үүсэж эхлээд байгаа. Төв талбайн ойролцоо сүлжээ унагах төхөөрөмжийг албаныхан байршуулж байгаа талаар эх сурвалж мэдээлсэн билээ.

Тэгвэл энэ талаар Цагдаагийн ерөнхий газрын Хэвлэл мэдээллийн төвийн мэргэжилтнээс тодруулахад “Сүлжээ унагагч байршуулаагүй. Цагдаагийн албан хаагчид байрлуулсан хяналтын камертаа засвар, тохиргоо хийсэн. Соёлын төв өргөөн дотор байдаг хяналтын камерыг янзалсан” гэлээ.