Гуравдугаар сарын 3-нд Турк Улсаас ирсэн нислэгт хийсэн хяналт, шалгалтын талаар Гаалийн ерөнхий газраас мэдээлэл хийж байна. ГЕГ-ын Хуулийн хэлтсийн ахлах байцаагч Ч.Тамираа

Тэрбээр “Гаалийн харилцаанд орж байгаа иргэний ганцхан үүрэг нь улсын хилээр нэвтрүүлж байгаа бараагаа үнэн зөв мэдүүлэх. Цахим сүлжээнд лайв хийгээд байгаа эмэгтэй Ю нь бараагаа гаальд мэдүүлсэн боловч шалгалтын явцад дутуу мэдүүлсэн нь тогтоогдсон. Дутуу мэдүүлэхдээ тав дахин багасгаж мэдүүлсэн байгаа юм. Гаалийн байгууллага иргэн Ю-ийн 307 боодол ачааг шалгахад 13500 ширхэг барааг дутуу мэдүүлсэн нь тогтоогдоод байна. Иргэн Ю-ийн 122 боодол ачаа шалгагдаагүй байгаа. Үүнээс ямар зөрчил гарахыг мэдэхгүй байна. Өглөө шалгалтын ажиллагаа үргэлжлэх байсан боловч иргэн Ю нь цагтаа ирээгүй. “Чингис хаан” олон улсын нисэх буудалд өдөрт дунджаар 3-4 онгоц бууж байгаа.Бид рентген, үнэртүүлэгчээр ачаа, бараагаа шалгаад нэвтрүүлдэг. Шаардлагатай буюу хар тамхи, хориотой бараа байж болзошгүй бараан дээр эрэлч нохой ажиллуулж, шалгадаг. Иргэн Ю-ийн мэдүүлсэн ачаа бараа, бодит байдал дээрээ зөрж байгаа нь тодорхой байсан учраас биечлэн хяналт, шалгалтыг хийсэн. Иргэн Ю нь тээврийн зардлаа эхний байдлаар 64 сая гэж худал мэдүүлсэн. Бид тээвэрлэлтийн компанитай холбогдож тодруулахад “Иргэн Ю-ийн ачааг 300 гаруй сая төгрөгөөр тээвэрлэсэн” гэж мэдүүлсэн. Мөн нэр төрөл, тоо ширхгийг нь багасгаж, зарим бараагаа огт мэдүүлээгүй байсан. Дээрээс нь өндөр үнэтэй ачаа бараагаа хямдхан бараа болгож, худал мэдүүлсэн. Гаалийн байгууллага эрсдэлийг тооцож үзээд, иргэн Ю-ийн барааг зайлшгүй шалгах шаардлагатай гэж үзсэн. Энэ хүрээнд нэг бүрчлэн биет шалгалт хийсэн гэдгийг хэлье” гэлээ.