Гуравдугаар сарын 3-нд Турк Улсаас ирсэн нислэгт хийсэн хяналт, шалгалтын талаар Гаалийн ерөнхий газраас мэдээлэл хийж байна. Энэ үеэр ГЕГ-ын харьяа “Чингис хаан” олон улсын нисэх буудлын Гаалийн газрын дарга Г.Баасандорж өнгөрсөн долоо хоногт “Барааг маань нэг бүрчлэн үзэж, хайрцаг савыг нь эвдэж байна” хэмээн шууд дамжуулалтыг хийсэн эмэгтэйн талаар мэдээлэл өглөө.

Тэрбээр “Сүүлийн үед цахим орчинд явагдаж байгаа асуудлын талаар товчхон мэдээлэл өгье. Цахим сүлжээнд лайв, мэдээлэл хийгээд байсан эмэгтэй нь өнгөрсөн долоо хоногт буюу гуравдугаар сарын 7-ны өдөр тус гаалийн газарт ачаа тээшээ мэдүүлсэн. Нийт 19.9 тонн 472 ширхэг хайрцаг ачааг мэдүүлсэн байдаг. Гаалийн байцаагч нар ачаа, тээшний итгэмжлэгдсэн төлөөлөгч, эзнийг заавал ч үгүй байлцуулж байж хяналт, шалгалтын үйл ажиллагаа явуулдаг. Гэтэл цахим сүлжээнд лайв хийгээд байсан эмэгтэй нь гаалийн байцаагчийг дуудахаар ирэхгүй, ирэхээрээ ачаа бараагаа шалгуулахгүй байсан. Тухайн иргэнд асуудлыг ойлгуулж, хэлэлцэж, өнгөрсөн баасан гарагт хяналт, шалгалтыг хийсэн. Одоогийн байдлаар тухайн иргэний 322 хайрцаг ачааг шалгаж дууссан байгаа” гэлээ.