Гуравдугаар сарын 3-нд Турк Улсаас ирсэн нислэгт хийсэн хяналт, шалгалтын талаар Гаалийн ерөнхий газраас мэдээлэл хийж байна.

      ГЕГ-ын Зөрчилтэй тэмцэх, хэрэг бүртгэх албаны дарга Б.Сүхбаатар “Гаалийн байгууллагаас өнгөрсөн 2021 он болон энэ оны эхний улирлын байдлаар илрүүлж байгаа хэрэг, зөрчлийн талаар мэдээлэл хүргэе. 2021 онд Гаалийн тухай хууль зөрчиж, гаалийн мэдүүлэгт барааг бичилгүй орхисон, барааны нэр төрөл, үнэ, тоо хэмжээ, ангиллын код зэргийг худал мэдүүлсэн 933 удаагийн зөрчлийг илрүүлж, улсын төсөвт хоёр тэрбум 272 сая төгрөгийн татварыг нөхөн төлүүлж, 1.6 тэрбумын төгрөгийн торгууль, шийтгэлийг ногдуулсан байдаг. Илрүүлж, шийдвэрлэж байгаа хэргийн 80 хувь нь улсын хилээр орох чиглэлд, 15 хувь нь гарах чиглэлд үйлдэгдсэн байна. Нийт зөрчилд холбогдсон субъектүүдийн 55 хувь нь зорчигч буюу иргэн байна. Энэ оны эхний хоёр сарын байдлаар гаалийн байгууллага 192 зөрчил илрүүлж, 251.3 сая төгрөгийн торгууль шийтгэл ногдуулж, 450 гаруй сая төгрөгийн татварыг нөхөн төлүүллээ. Чингис хаан олон улсын нисэх буудлын Гаалийн газарт илрүүлж, шийдвэрлэсэн 60 зөрчлийн 53 хувь нь гаалийн болон бусад татвараас зайлсхийх зөрчил эзэлж байна. Тус гаалийн газарт илрүүлж, шийдвэрлэж байгаа нийт зөрчлийн 64 хувь нь улсын хилээр орох чиглэлд, 36 хувь нь гарах чиглэлд үйлдэгдсэн. Цар тахлын улмаас хэсэгчлэн хаалттай байсан хилийн хөдөлгөөн 2021 оны наймдугаар сарын 1-нээс хэсэгчлэн нээгдэж эхэлсэн. Үүнтэй холбоотойгоор Турк Улсаас Монгол Улс чиглэсэн бараа эргэлт, зорчигч хөдөлгөөн нэмэгдэж, дотоодын эрэлтийг хангаж байгаа эерэг үзүүлэлт гарсан. Гэсэн хэдий ч үүнийг дагаад хилээр нэвтрүүлэхийг хориглосон, хууль бус барааны эрэлт нэмэгдэх хандлагатай байгаа" гэв.