Цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн хүрээнд Төрийн албаны зөвлөлөөс 411 дүгээр тогтоолыг батлан гаргасан байдаг. Тус тогтоолд төрийн жинхэнэ албаны нөөцөд бүртгүүлээгүй, сонгон шалгаруулалтгүйгээр, хууль, албан тушаалын тодорхойлолтод заасан тусгай шаардлагыг хангаагүй албан тушаалд томилогдсон албан хаагчдыг өнгөрсөн оны арванхоёрдугаар сарын 31-ний өдрөөр ажлаас нь чөлөөлөхөөр болсон юм. Харин 411 дүгээр тогтоолыг гаргаад удаагүй байхад Ковидын хуулийг дахин зургаан сараар сунгасан билээ.

Тус тогтоолын хэрэгжилтийн талаар Төрийн албаны зөвлөлийн гишүүн Д.Баатарсайхан хэвлэлд өгсөн ярилцлагадаа “Захиалга нь хүрээд ирвэл Хууль зүй, дотоод хэргийн яам, Байгаль орчин, аялал жуулчлалын яамны Төрийн нарийн бичгийн даргын сонгон шалгаруулалтыг хийх боломжтой. Харин Соёлын яамны Төрийн нарийн бичгийн даргын сонгон шалгаруулалтын захиалга огт ирэхгүй байна. Сонгон шалгаруулалтад ороогүй гурван ТНБД, таван агентлагийн дарга байна” хэмээжээ.

Тэгвэл бид төрийн албаны шалгалт өгөх захиалга ганц ч удаа өгөөгүй гэх Соёлын яамны Төрийн нарийн бичгийн дарга С.Оюунбилэгтэй холбогдож, шалгалтаа хэзээ өгөх талаар нь тодрууллаа.

-Та Төрийн жинхэнэ албан хаагчийн шалгалтаа хэзээ өгөх вэ?

      -Яасан юм бол оо.

-Таныг ТАЗ-өөс шалгалт өгөх захиалгаа ганц ч удаа өгөөгүй гэсэн байна?

        -Аан за. Би өөрөө Төрийн албаны зөвлөлийнхөнтэй ярина. Намайг шалгалт өгөөгүй гэдгийг Төрийн албаны зөвлөлийн хэн гэдэг хүн ярьсан бэ. Би хэн гэдэг хүнтэй ярих вэ. Төрийн албаны зөвлөлийн дарга ч шалгалт өгөх талаар мэдэхгүй л дээ. Зохих ном журмын дагуу л шалгалтаа өгөх байх. 

-Та ТНБД-аар сонгогдоод зургаан сар боллоо. Яагаад өнөөдрийг хүртэл шалгалтаа өгөхгүй байгаа юм бол?

         -Би чинь Төрийн тусгай албан хаагч байсан шүү дээ. Шалгалт өгөх эсэх нь миний хувийн эрхийн асуудал учраас та бүхэнд хамааралгүй.