Хан-Уул дүүргийн 21 дүгээр хороо буюу Нисэхийн тойрогт баригдаж буй барилга шатсан талаар бид өмнө нь мэдээлсэн билээ. Тодруулбал, галын тухай дуудлага өчигдөр 14:07 цагт Онцгой байдлын газарт ирсэн байдаг. Дуудлагын дагуу Гал түймэр унтраах, аврах 10, 14, 18, 30 дугаар ангийн 40 гаруй алба хаагч, долоон автомашинтай гал түймрийг унтраахаар ажиллаж, 15:40 цагт галын тархалтыг зогсоосон юм. Аврагчид галаас 12 иргэний амийг аварч, галыг бүрэн унтраасан билээ.  

 Урьдчилсан байдлаар гал цахилгааны гэмтлээс болж гарсан байж болзошгүй байгаа аж. Галын дүгнэлт 14 хоногийн гарна.

Бид гал юунаас болж гарсан талаар барилгын эзэнтэй холбогдож, тодруулахад “Одоогийн байдлаар мэдээлэл өгөх боломжгүй. Гал гарсан шалтгааныг мэдэхгүй. Бидэнд хэцүү байна” гэлээ.

Иймд иргэд та бүхнийг галын аюулаас сэрэмжтэй байхыг анхааруулж байна.