Авлига, албан тушаалын хэрэгт удаа дараа холбогдсон ч, хариуцлага хүлээж, халаагаа өгөөгүй үлдсэн “ганц” нь “Монгол-Орос”-ын хамтарсан III сургуулийн захирал Ж.Соронзон. Түүнтэй холбоотой “Сургуульдаа шинэ сурагч элсүүлэхдээ авлига авдаг”, “Багш, ажилтнуудаа дарамталдаг” гэх зэрэг мэдээлэл сүүлийн 10 жилийн турш нийгмийн сүлжээгээр хөвөрсөн ч, Ж.Соронзон “нохой хуцсан чинээ тоохгүй” байсаар өдгөө тус сургуулийн захирлаар 30 жил ажиллажээ.

-ХЭРЭГТ “ХАДААТАЙ” Ж.СОРОНЗОН-

“Монгол-Орос”-ын хамтарсан III сургуулийн захирал Ж.Соронзонгийн нэр холбогдсон авлига, албан тушаалын хэргүүд 2011 оноос эхлэлтэй. Тус сургууль “Хаврын шалгалтдаа муу хангалтгүй үнэлгээ авсан” гэх шалтгаанаар 80 сурагчийг сургуулиасаа хөөж байлаа. Тухайн үед сургуулиасаа хөөгдсөн 80 сурагчийн эцэг, эх БСШУЯ-ны гадна жагсаал хийж, эсэргүүцэж байсан ч, амжилтгүй ололгүй сургуулиасаа хөөгдсөн сурагчдын хэрэг замхарсан.

Тэгвэл "муу нэр"-нээс салдаггүй Ж.Соронзон захиралтай холбоотой гомдол, мэдээлэл өнгөрсөн намраас дахин цацагдаж эхлэв. Мөн үүнтэй холбоотойгоор “Монгол-Орос”-ын хамтарсан III сургуулийн нэр бүхий багш нар Ж.Соронзонг шалгуулахаар АТГ-т хандаж байсан талаар бид өмнө нь мэдээлсэн. Тухайлбал,  Монгол-Орос”-ын хамтарсан III сургуулийн захирал Ж.Соронзон нь ОХУ-аас ирсэн багш нараа дарамталдаг, хясан богдуулдаг, хууль бусаар ажлаас нь халдаг, хуучин бараа, эд зүйлс сургуулийн багш нартаа зарж, шахдаг талаарх ноцтой баримтыг хууль хяналтын байгууллагад хүргүүлсэн байна. Мөн Ж.Соронзон нь ажилтнуудынхаа цалинг буухаас өмнө багш нартаа хуучин бараа, эд зүйлс их хэмжээгээр шахаж, мөнгийг нь цалингаас нь суутгаж, эсэргүүцэл үзүүлсэн тохиолдолд торгуулийн арга хэмжээ авч, бүр ажлаас нь хүртэл халж байсан аж.

          “Монгол-Орос”-ын хамтарсан III сургууль 200 гаруй багш, ажилтантай. Харин тус сургуулийн захирал Ж.Соронзон нь өөрийн хуучин бараа, эд зүйлс сургуулийн багш нартаа зарж, шахдаг, цалин буух үеэр өөрийн хүмүүсээрээ дамжуулж, багш нараа нэг нэгээр нь дуудаж, өөрийнхөө өмсөж байсан хуучин хувцсаа зардаг гэнэ. Энэ тухай тус сургуулийн нэр бүхий багш нарын АТГ-т хүргүүлсэн гомдолд “Хуучин хувцас зарж, их хэмжээний мөнгө олдог тул шалгаж өгнө үү” гэсэн байдаг.

Тэгвэл сүүлийн үед үүсээд байгаа нөхцөл байдал болон “Монгол-Орос”-ын хамтарсан III сургуулийн сургалт тасалдсантай холбоотойгоор тус сургуулийн сурагчдын эцэг, эхийн төлөөлөл Боловсрол, шинжлэх ухааны яамны гадна жагсаал зохион байгуулсан. Улмаар уг асуудалд Боловсрол, шинжлэх ухааны дэд сайд Г.Ганбаяр “Ж.Соронзон захирлын асуудлыг хуулийн байгууллага шалгаж байгаа. БШУЯ-наас энэ асуудлаас болж, 2200 хүүхэд хохирч болохгүй гэсэн сануулгыг тус сургуулийн удирдлагуудад өгсөн” тухай мэдэгдэл хийсэн юм.

Мөн “Монгол-Орос”-ын хамтарсан III сургуулийн ТУЗ хуралдаж, ажлын хэсэг байгуулахаар болсон аж. Ажлын хэсэгт БШУЯ-ны Хяналт шинжилгээ, үнэлгээний газар, хуулийн хэлтсийн мэргэжилтнүүд багтахаас гадна сурагчдын эцэг, эхийн төлөөлөл багтаж, Ж.Соронзон захирал болон сургалттай холбоотой асуудлыг судлах гэнэ.

          Үүсээд байгаа нөхцөл байдалтай холбоотойгоор “Монгол-Орос”-ын хамтарсан III сургуулийн захирал Ж.Соронзон хэвлэлд өгсөн ярилцлагадаа “Олон жил ажиллахаар олон хүн бас дургүйцдэг юм шиг байна. Олон хүн бас үр хүүхдээ бодон зүтгүүлэхийг хүсэж байгааг би бас мэднэ. Гэвч зарим хүмүүсийг алдаршуулан баярлуулаад амрах цаг дөхжээ” гэж онцолжээ.

Өдгөө 65 настай Ж.Соронзон тус сургуулийн захирлаар 30 жил ажиллав. 10 жилийн турш авлига, албан тушаалын хэрэгт “хадаатай” явсан Ж.Соронзон халаагаа өгөх цаг нь болжээ.