Засгийн газрын ээлжит хуралдаанаар зарим албан тушаалтнуудыг дэд сайд, төрийн нарийн бичгийн даргын албанд томилж заримыг нь өөр байгууллагад сэлгэн ажиллуулах асуудлыг хэлэлцэж байна. Тухайлбал, ХЗДХЯ-ны Төрийн нарийн бичгийн дарга Б.Баасандоржийг чөлөөлж, Мэргэжлийн хяналтын ерөнхий газрын даргаар томилсон юм.

              Мэргэжлийн хяналтын ерөнхий газрын даргаар томилогдсон Б.Баасандорж нь өнгөрсөн 2020 оны наймдугаар сард ХЗДХЯ-ны Төрийн нарийн бичгийн даргаар томилогдож байсан. Тэрбээр 1979 онд төрсөн. МУИС-ийн Хууль зүйн сургууль, АНУ-ын Калифорнийн олон улсын их сургууль төгссөн. Эрх зүйч мэргэжилтэй, бизнесийн удирдлагын магистр. 2001 оноос УИХ-ын Тамгын газрын Ерөнхий нарийн бичгийн даргын туслах, Хуулийн хэлтсийн шинжээч, Хууль зүйн байнгын хороонд референт, зөвлөх, ахлах зөвлөх, Хууль зүйн яаманд газрын дарга, 2015 оноос УИХ-ын Хууль зүйн байнгын хорооны ахлах зөвлөхөөр ажиллаж байсан. Мөн 2018-2020 онд УБЕГ-ын даргаар ажиллаж байсан юм. Тэрбээр төрийн албанд 21 дэх жил ажиллаж байгаа билээ.

          Тэгвэл зарим хэвлэл мэдээллийн хэрэгслээр МХЕГ-ын дарга Б.Баасандорж нь хуучин нягтлангаа халж, өөрийн хүнээ нягтлан бодогчоор томилсон талаар мэдээлэл цацагдаад байна. Бид энэ талаар МХЕГ-ын шинэ нягтлан бодогч Н.Найдандоржоос тодрууллаа.

           Тэрбээр “Би ажлаа аваад 10 хонож байна. Мэргэжлийн хяналтын ерөнхий газрын хуучин нягтлан бодогч нь Сангийн яам руу тушаал дэвшиж, томилогдсон. Ийм учраас намайг энэ албан тушаалд томилсон” гэлээ.