ТЕГ-аас иргэн Ч.Мөнхбаярыг саатуулах ажиллагаа явуулж, баривчилсан билээ. Тодруулбал, өчигдөр 15:30 цагийн үед Сүхбаатар дүүргийн нутаг дэвсгэрт байрлах "Наран" плазагийн ойролцоо түүнийг гудамжинд явж байхад нь баривчилсан билээ. Мөн Сонгинохайрхан дүүргийн 15 дугаар хороо, 23 дугаар байрны нэгдүгээр орцонд гүйцэтгэх ажиллагаа явуулж, түүнийг гэрт нэгжлэг хийсэн байдаг.

    Зарим эх сурвалжийн мэдээллээр Ч.Мөнхбаярыг нийгмийн сүлжээнд бичсэн посттой нь холбогдуулан баривчилсан хэмээн ярьж байна. Тухайлбал, Ч.Мөнхбаяр лхагва гарагийн 16:00 цагийн үед цахим хуудастаа Ерөнхий сайд Л.Оюун-Эрдэнэ, УИХ-ын гишүүн асан Б.Болд, Ж.Батзандан нарын зурагтай пост оруулсан байдаг. Мөн “Гурван жилийн өмнө иргэний хөдөлгөөдтэй уулзах үедээ “Би хэзээ ч албан тушаалд очихгүй, та нартайгаа хамт гудамжинд жагсаж тэмцэнэ” гэж байсан. “Ордон орчихоод, удахгүй гараад ирнэ” гээд орсон. Гэтэл ордон ороод хоёр сар болчихжээ. Эргэж та нартайгаа уулзалгүй хоёр сар болчихжээ. Ордон ороод, "ЗГХЭГ-ын дарга болчихвол бидний яриад байсан юмнууд бүтэх юм байна" гэдгийг мэдэнгүүтээ би цаг алдахгүй гээд бушуухан ЗГХЭГ-ын дарга болчихсон юм даа. Тэгээд биднийг “Одоо та нар тарцгаа. Талбай дээр барьсан гэрээнүүдийг буулгацгаа. Гахай жил бүх юм сайхан болно. Би МАНАН-гийн эсрэг тэмцлээсээ ухрахгүй, амь хайргүй тэмцэхээ андгайлж байна” гэж бичжээ. Түүнийг вичатаар өвөрмонголчуудыг "Монгол руу нэвтрэхэд тусална" гэх мэт зар түгээдэг. Гадаадын тусгай албанд янз бүрийн мэдээлэл түгээдэг гэх мэт  ноцтой мэдээллүүд бий.

     Харин түүнийг чухам ямар шалтгааны улмаас баривчилсан талаар ТЕГ-аас өнөөдөр мэдээлэл өгөх аж.

Ч.МӨНХБАЯР ГЭЖ ХЭН БЭ

    ОХУ-ын Уралын их сургууль, МУИС суралцаж төгссөн. 1990-ээд оноос эхлэн чөлөөт хэвлэлүүдэд сэтгүүлчээс сонинуудын нэгдсэн редакцийн эрхлэгч хүртэл алба хашиж, Монголын Ногоон намын Ерөнхий нарийн бичгийн даргаар ажиллаж байсан. Өдгөө "Монгол хүн монгол хүндээ тусалъя" ТББ-ын тэргүүнээр ажилладаг билээ.

    Тэрбээр “Өвөрмонголд сургуулийн өмнөх насны хүүхдийг хятадаар сургах болсныг эсэргүүцье", “Хазара монголчуудад тусалъя”, “Эх хэлээ аваръя” зэрэг сэдвээр хэвлэлийн бага хурал хийж, үзэл бодлоо илэрхийлж байсан. Мөн тэрбээр Эрх чөлөөг хэрэгжүүлэгч намаас УИХ-ын сонгуулийн 28-р тойрогт нэр дэвшиж байжээ.