Нийтийн тээврийн  автобус явган зорчигч зам тээврийн ноцтой осол гаргаж, явган зорчигч дайрчээ. Тодруулбал, өнөөдөр 09:50 цагийн Нисэх-МУБИС чиглэлийн автобус зам гарч явсан иргэнийг мөргөж, хүнд гэмтэл учруулжээ. Ослын газарт цагдаагийн албан хаагчид болон шинжээчид ажиллаж байгаа аж. Одоогийн байдлаар хохирогчид эмнэлгийн анхан шатны тусламж үзүүлж, эмнэлэгт хүргэжээ.

Осол гаргасан автобусны жолооч сэтгүүлчдэд мэдээлэл өгөхдөө “Би буруугүй, Замын хөдөлгөөний дүрмийн дагуу хөдөлгөөнд оролцож явсан. Ногоон гэрлээр урд уулзвараар эргээд гарсан юм. Гэтэл гэнэтхэн хүн гараад ирсэн, тэгээд л  огцом тоормос дартал гулгаад мөргөчихсөн. Осол гарах үед автобусан дотор олон зорчигч байсан” гэжээ.

Мөн Тээврийн цагдаагийн албаны алба хаагч Г.Отгонтамир хэлэхдээ “Сургуулийн үйл ажиллагаа эхэлсэнтэй холбоотой замын хөдөлгөөн эрс нэмэгдэж байна. Энэ  үед иргэд олон нийт анхааралтай байж аюулгүй байдлаа хангах нь чухал. Цас орсон, замын халтиргаа үүсэх өндөр эрсдэлтэй байгаа учир жолооч, явган зорчигчид бүгд анхаарал болгоомжтой явах, бэртэж, гэмтэхээс болгоомжлох, зориулалтын бус газраар гарахгүй байхыг урьдчилан сануулж байна” гэлээ.

Э.Энхмаа