Хан-Уул дүүргийн XII хорооны 40-ын байрнаас энэ сарын 5-нд долоон настай охин алга болсон. Цагдаагийн алба хаагчид дуудлагын дагуу шалгалтыг үргэлжлүүлэхэд долоон настай М-ийг ээжийнх нь найз болох 28 настай, эмэгтэй С.А гэгч нь “Тоглоомын талбайд  тоглоё” хэмээн худал  хэлж, авч  явсан нь тогтоогдсон. Хэрэгт холбогдогчийг энэ сарын 6-нд баривчилж, хүүхдийг ар гэрийнхэнд нь хүлээлгэн өгч,  гэмтлийн зэрэг тогтоолгохоор Шүүх шинжилгээний үндэсний төвд шинжээч томилон, хамтарсан баг ажиллаж байгаа талаар бид өмнө нь мэдээлсэн билээ. 28 настай эмэгтэй С.А гэгч долоон настай охиныг ямар учир шалтгааны учраас ар гэрийнхэнд нь хэлэлгүй авч явсныг охины нагац ахаас тодрууллаа.

-Та дүүг нь “Толгоомын талбайд хамт тоглоё” хэмээн худал хэлж, дагуулж явсан эмэгтэйг таних уу?

       -Энэ сарын 5-нд дүүгийн минь охин өвөөгийндөө буюу манай аавынд байсан юм. Тухайн үед ээжийнх нь найз гэгдэх эмэгтэй аавтай золгохоор ирсэн юм билээ. Би тэр эмэгтэйг танихгүй. Түүний тухай өмнө нь сонсож байгаагүй. Харин манайхаас явахдаа дүүг минь “Агаарын тенис тоглоё” гэж дагуулж гараад 20 гаруй цаг сураггүй алга болсон. Дүүг минь юу санаж авч явсныг нь мэдэхгүй байна.

-Охиныг яаж олсон бэ?

      -Бид тэр эмэгтэйг буцаж ирэх нь тодорхой, ойрхон байгаа гэж таамаглаж байсан. Хотын төв орно гэж санаагүй.  Тэгээд тэр эмэгтэйг аргадаж, эвтэйхэн ярьж байгаад охиныг авч явсан газар буюу аавынд ирүүлж, бидэндтэй хамт дүүг минь хайсан цагдаа нар баривчлаад авч явсан.

-Охиныг хэрхэн хайсан бэ. Цагдаа нар яаж ажилласан бэ?

       -Миний таньж мэдэх 30 орчим хүн, Хан-Уул дүүргийн хоёрдугаар хэлстийн гурван цагдаа Биокомбинатын 40-ын байрыг бүсэлж, дүүг минь шөнөжин хайсан. Гэтэл тэр эмэгтэй дүүг минь дагуулж айлд орж, 7-8 цаг болчихоод хотын төв рүү унаа хөлсөлж яваад, дүүтэй минь хамт буудалд хоночихоод, Баруун салаа орсон байна лээ.

-Охины сэтгэл зүй болон биеийн байдал ямар байгаа вэ?

      -Дүү минь айдасгүй, биед нь учирсан хохиролгүй, ээжтэйгээ аюулгүй байгаа. Дүүгээ аюулгүй, эсэн мэнд ирсэнд нь баярлаад сууж байна.

-Охин та бүхэнд дагуулж явсан эмэгтэйн талаар ямар нэгэн зүйл ярьсан уу?

     -Тэр эмэгтэй дүүгийн минь биед халдаагүй, загнаж, зодоогүй, муу юм хийх гэж оролдоогүй байна лээ. Дагуулж явсан эмэгтэйг цагдаа нар баривчлаад авч явсан болохоор ямар нэгэн зүйл асуух боломж байсангүй. Би түүнийг “Хүүхдээ санаад дүүгээр минь хүүхдээ орлуулж хамт хоносон юм болов уу. Дүү минь хүүхэдтэй нь адилхан байсан болоод эзгүйчилж авч явсан юм болов уу” гэж бодсон. Харин түүнийг санаатайгаар хулгайлж, эд эрхтэнийг нь зарах гэж оролдоогүй гэж ойлгосон.

      Мөн тус хэргийн талаар Хан-Уул дүүргийн XIX хорооны мэргэжилтнээс тодруулсан юм. Тэрбээр “Охин өвөө дээрээ хааяа ирдэг, ихэвчлэн Чингэлтэй дүүрэгт эмээтэйгээ хамт амьдардаг юм билээ. Охины ээж Хэнтий аймгийн харьяатай, тодорхой эрхэлсэн ажилгүй эмэгтэй бий. Бид охины өвөөгийнд ирчихсэн нөхцөл байдлын талаар тодруулж байна” гэсэн юм. Харин охин ээж Д.Цогжаргалаас охиных нь талаар болон найз бүсгүйнх нь тухай тодруулахад “Охин минь эсэн мэнд олдсон. Үүнээс өөр тайлбар, мэдээлэл өгөхгүй” гэсэн юм.

ХҮҮХЭД ХУЛГАЙЛСАН БАЙЖ БОЛЗОШГҮЙ ЭМЭГТЭЙ ӨМНӨ НЬ ХЭРЭГТ ХОЛБОГДОЖ БАЙЖЭЭ

     Долоон настай охиныг хулгайлсан байж болзошгүй эмэгтэй өмнө нь ямар нэгэн хэрэгт холбогдож байсан эсэх талаар Цагдаагийн ерөнхий газрын мэргэжилтнээс тодрууллаа. Тэрбээр "Тус эмэгтэйг өмнө нь бусдыг залилсан гэмт хэрэгт холбогдож, эрэн сурвалжлагдаж байсан юм байна. Тэрбээр охины ээжтэй сүүлийн хоёр жил дотно найзалсан юм байна. Мөн энэ удаа цагдаа нарт баривчлагдаж, саатуулагдсаныхаа дараа "Согтууруулах ундаа хэрэглэсэн байсан" гэж мэдүүлсэн ч шалгалтын явцад худал мэдүүлэг өгсөн нь тогтоогдсон. Үүнээс өөр дэлгэрэнгүй мэдээлэл ирээгүй байна" гэсэн юм.