Иргэд хаврын тэргүүн сарын шинийн 15-нд багтаж, шинэ жилийн заслаа хийлгэж, номоо уншуулах сонирхолтой байдаг. Энэ нь бурхан багш дээрх хугацаанд багтаж бүхий л номоо уншиж, хувилгаан дүр үзүүлж байсан гэдэгтэй холбоотой. Уг хугацаанд буян үйлдвэл жирийн өдрөөс илүү бүтэмжтэй сайн хэмээн үздэг билээ.

          Гэвч дэлхий даяар дэгдээд буй “Ковид-19” цар тахлаас урьдчилан сэргийлэх, халдвар хамгааллын дэглэм баримтлахтай холбоотойгоор Засгийн газар болон бусад холбогдох байгууллагаас иргэдийг гэр гэртээ шинэлэхийг уриалаад байгаа. Тэгвэл цаг үеийн нөхцөл байдалтай холбогдуулан сүсэгтэн олонд Сар шинийн засал хийх, номыг нь уншиж өгөх үйлчилгээ бий болжээ. ЭРГЭЛТ.МН сайт гэрээсээ гарахгүй, гандан, хийд орох шаардлагагүйгээр интернэт ашиглаж, заслаа хийлгэх тухай зөвлөгөөг хүргэж байна.

Гандантэгчилэн хийд цахимаар засал хийх 5000-13000 төгрөгийн багц гаргажээ

Засал, номоо уншуулах хүсэлтэй иргэд Гандантэгчилэн хийдийн www.gandan.mn сайтад хандаж, өөрийн төрсөн он, жил, хүйсийг бүртгүүлснээр “Буян үйлдэгч” хэмээх бар жилд суусан суудал, ерөнхий мэнгэний буулгаа, хийлгэх засал, уншуулах номоо ч харж болно. Хэрэглэгч хийлгэх засал, номоо өөрийн хүслээр харж, сонгох бөгөөд сонголтоо хийсний дараа Хаан банк болон Голомт банкны дансанд уншуулах номын үнийг шилжүүлэх юм. Шилжүүлэхдээ хэрэглэгч өөрийн овог, нэр, тайлбар, холбоо барих утасны дугаар бүртгүүлнэ. Бүртгүүлсэн гар утасны дугаар руу бүртгэл амжилттай болсон эсэх, засал, номыг уншиж дууссан тухай мэдэгдэл ирэх аж.

          www.gandan.mn сайтад бүртгүүлсэн хэрэглэгчийн засал, номыг Гандантэгчилэн хийдийн “Фэйсбүүк” сүлжээн дэх албан ёсны цахим айлтгалын хуудсаар шууд дамжуулан хүргэх юм. Мөн Гандантэгчилэн хийдийн цахим сүлжээнд уншуулах сар шинийн засал, ном нь багц үнэтэй аж. Тодруулбал,

• Хий суудалд суусан хүний заслуудын багц 9500 төгрөг
• Мод суудалд суусан хүний заслуудын багц 13000 төгрөг
• Уул суудалд суусан хүний заслуудын багц 8500 төгрөг
• Ус суудалд суусан хүний заслуудын багц 6500 төгрөг
• Огторгуй суудалд суусан хүний заслуудын багц 8000 төгрөг
• Төмөр суудалд суусан хүний заслуудын багц 7500 төгрөг
• Шороо суудалд суусан хүний заслуудын багц 6000 төгрөг
• Гал суудалд суусан хүний заслуудын багц 5000 төгрөг байна.

Meets, Zoom аппликэйшн ашиглаж, заслаа хийлгэж болно

          Ухаалаг гар утас хэрэглэгчид мөн Дашчойлин хийд болон Самъяа хийдийн албан ёсны аппликэйшнийг гар утасныхаа Playstore, App Store-оос татаж, бүртгүүлнэ. Дээрх хоёр хийд нь сүсэгтэн олны засал, номыг нь Meets, Zoom зэрэг аппликэйшнээр хүргэж байгаа аж. Мөн иргэд дээрх хийдүүдийн албан ёсны цахим хуудас болон Лавайн эгшиг аппликэйшнээр засал, номыг даган баясах боломжтой юм.