Олимпын аварга, Хөдөлмөрийн баатар Н.Түвшинбаяр багын найз, улсын өсөх идэр начин Э.Энхбатыг зодож, амь насанд нь хүрсэн харамсалтай хэрэг гарсан билээ.

Олимпын аварга Н.Түвшинбаярыг яллагдагчаар татаж, нэг сарын хугацаатай цагдан хориод байгаа. Э.Энхбат начны амиа алдсан хэрэгт Булган аймгийн ИТХ-ын төлөөлөгч С.Гал-Эрдэнийг мөн яллагдагчаар татах санал хүргүүлсэн талаар бид өмнө нь мэдээлсэн.

Эх сурвалжийн өгсөн мэдээллээр “С.Гал-Эрдэнийг зодоон болж байгааг мэдсээр байж хаалгаа цоожилсон. Зодооныг салгаагүй бөгөөд иргэний үүргээ гүйцэтгээгүй” гэх шалтгаанаар шалгаж, яллагдагчаар татах саналыг мөрдөн байцаагч нь прокурорт хүргүүлсэн” гэсэн юм. Өөрөөр хэлбэл, С.Гал-Эрдэнийг яллагдагчаар татах саналыг мөрдөн байцаагч гаргаж, НПГ-т хүргүүлсэн гэсэн үг. НПГ-аас С.Гал-Эрдэнийг яллагдагчаар татах эсэхийг эцэслэн шийднэ.

Бид энэ талаар С.Гал-Эрдэнээс тодруулахад “Одоогийн байдлаар мэдээлэл өгөхгүй. Хэн, ямар яриа гаргаж, намайг яллагдагчаар татах санал хүргүүлсэн гэж бичээд байгааг мэдэж байгаа. Намайг яллагдагчаар татсан юм байхгүй” гэлээ.