“Эрдэнэсийн уурхайчид” багийн лидер тоглогч Т.Санчир багийн тамирчнаа өшиглөж, танхайрч, ёс зүйгүй үйлдэл гаргаж байгаа бичлэг цахим орчинд тархаад байгаа билээ. Тэгвэл Т.Санчир цахим хуудастаа дараах тайлбарыг хийжээ.

                           Тэрбээр “Өдрийн мэнд хүргэе. Өчигдөр орой тоглолт дуусаад ёс зүйгүй үйлдэл гаргасан нь миний буруу. Сагсан бөмбөг сонирхогч хүүхэд залуусаас уучлалт хүсэж байна. Яагаад ийм зүйл болсон бэ гэхээр манай багийн хувьд лигийн бэлтгэлдээ есөн сараас хойш хамрагдсан. Манай нэг тамирчин энэ хугацаанд 8-9 удаа шалтгаангүй бэлтгэл тасалж, баг хамт олноо хүндлэхгүй, спортын сахилга батгүй үйлдэл гаргасан. Энэ болгонд нь би удаа дараа хэлж сануулсан.

 Манай багийн хоёр тоглогч ар гэрийн асуудалтай, тамирчид дутуу үед ийм шалтгаанаар чухал тоглолтын урд өдөр бэлтгэл тасалсанд бухимдлаа шууд илэрхийлсэндээ дахин уучлалт хүсэж байна.  Миний бие 2006 оноос Дээд лигийн тэмцээнд тоглож эхэлсэн ах нар, багш дасгалжуулагч, баг хамт олныхоо үгийг сонсож хүлээж авч ирсэн. Дахин ийм ёс зүйгүй үйлдэл гаргахгүй гэдгээ үүгээр мэдэгдэж байна” гэжээ.