Өнгөрсөн жил цар тахлын улмаас үндэсний баяр наадмыг тэмдэглэн өнгөрүүлээгүй. Засгийн газраас баяр наадмыг тэмдэглэн өнгөрүүлэх санал гаргасан ч иргэдийн эсэргүүцэлтэй тулж, эцэст нь шийдвэрээ цуцуалсан билээ. Тодруулбал, олон хүн цуглуулахгүй, бөөгнөрөл үүсгэхгүй, халдвараас урьдчилан сэргийлэх үүднээс наадам зохион байгуулахыг хориглосон юм.

 Гэтэл зохион байгуулаагүй баяр наадамд зориулж,  Улсын баяр наадмын комиссоос шагайн харваанд гэхэд л 20 гаруй сая төгрөгийн үргүй зардал гаргажээ. Тус комиссын шилэн дансны мэдээллээр “Шагайн салбар хороо бэлтгэл ажил зардал” гэсэн утгатай хоёр удаагийн гүйлгээ хийжээ. Тодруулбал, долдугаар сарын 22-нд Улсын баяр наадмын комиссоос “Урам Ундар” ХХК-ийн данс руу 19.760.000 төгрөг, Шагайн харвааны холбоо руу 5.326.000 төгрөгийг шилжүүлсэн байна. Улсын баяр наадмын комиссоос зохион байгуулаагүй наадам, шагайн харваанд зориулж 25 сая төгрөгийг шилжүүлжээ.