Сүүлийн хоёр жил Төрийн ордон энгэрээ цоолуулсан алдартнуудын хөлд дарагдаж, Төв талбайд баярын жагсаал тасарсангүй. Угтаа бол төрийн өндөрлөгүүд төрийн дээд одон медаль, цол тэмдэгийг баруун солгойгүй тарааж, гавъяатын тэмдэггүй хүн ховордов. Энд хийсэн бүтээснээ үнэлүүлж, төрдөө шагнуулсан түмэн олонг буруутгах гэсэнгүй. Гэвч төрийн дээд шагналыг хэлэх үгтэй, хийсэн гавьяатай олон жил төрд зүтгэсэн онцгой нэгэн хүртдэг баймаар. Харамсалтай нь сүүлийн үед хэн дуртай нь төрийн шагналд тодорхойлуулж, тодорхойлсон болгон нь шагнал хүртдэг муу жишиг тогтчихлоо.

Төрийн одон медалийг  сумын багийн хурал гардуулах нь энүүхэнд болж, шагналын үнэ цэнийг унагаж байна.

  Хамгийн сүүлд Х.Баттулга Ерөнхийлөгч суудлаасаа буухын өмнө долоо хоног дараалан шагнал гардуулахад таван Хөдөлмөрийн баатар, 20 гаруй гавьяат төржээ. Энэ бол жилдээ 1-2 Хөдөлмөрийн баатар салбар салбараас шигшигдсэн  10 гавьяат төрдөг бол энэ жишгийг тэрбээр хоёр дахин илүү биелүүлж. Үүнээс гадна Хөдөлмөрийн гавьяаны улаан тугийн одон, Соёлын Гавьяат Зүтгэлтэн, Цэргийн Гавьяаны улаан тугийн одон, Алтан гадас гэх зэрэг олон шагнал бий. Ингээд нийтээр нь тоолбол 100 хол давна. Ингэж нэг баяр наадмын үеэр түмэн шагналын хурд дарагдсан хүмүүс цуваа ч олигтой бэлдэж амжилгүй намартай золгоно. Намар дахиад л шинэ гарсан ерөнхийлөгч У.Хүрэлсүх бөөн багш нарт Гавьяатын тэмдэг зүүж өгсөн. Өнгөрсөн намар 10 Ардын багш, 30 Гавьяат багш төрсөн байна. Харин Хөдөлмөрийн Гавьяаны Улаан тугийн одонгоор 25 хүн шагнагдаж, Алтан гадас одонгоор  31 хүн шагнагдсан байна. Харин зургаан Хөдөлмөрийн баатар төрснөөр жилийн хугацаанд нийт 11 Хөдөлмөрийн баатар төрсөн байна.

Төрийн өндөр дээд шагнал хүртсэн хүний тоогоор нь улсын хөгжлийг тодорхойлдог бол манайх хэдийнээ өндөр хөгжилтэй орнуудыг тэргүүнд эгнээнд бичигдэхээр байна.

  Шагнал нүдээ олбол мөн ч сайхан байдаг сан. Ядаж л олны өмнө нүүр бардам зогсоно. Гэтэл жилд 20 гавьяат төрж байна гээд боддоо. Энэ жишгээр цол тэмдэг гардуулсаар байвал 10 жилийн дараа Монголд гавьяатын тэмдэггүй хүн байхгүй болох нь.  Уг нь цол дагаж, бяр гэдэг баймаар. Харин сүүлийн үед манайд хийснээсээ илүү цолтон бий болсон нь нууц биш юм.

 Хавтгайрсан шагналын ард өөрийгөө өндрөөр үнэлүүлж, улс төрийн нэр хүнд олох гэж зүтгэж яваа ч нэгэн ч бий. Өөрөөр хэлбэл, сүүлийн үед танил талаар дамжуулж, шагналд тодорхойлуулдаг, өөрийгөө магтуулдаг технологи ч бий болчихсон. Харин шагнал гардуулж байгаа нөгөө хэсэг нь ч өөртөө оноо авах гэж зүтгэдэг болсон нь илт байна. Үндсэндээ хавтгайрсан шагналын гороор өмнө нь төрд зүтгэж, хийсэн бүтээснээ үнэлүүлсэн ахмадуудын хөдөлмөр үнэгүйдэж мэдэх нь. Өөрөөр хэлбэл, хүү, охин нь хийсэн гавьяагүй хэр нь өөрөөс нь илүү одон медаль энгэртээ гялалзуулж, аархах цаг тун удахгүй ирэхээр байна.

Цаашид төрийн шагналыг өндөр шалгууртай болгож, хийсэн бүтээснийг нь зөвөөр үнэлдэг болмоор байна, Ерөнхийлөгч өө.