Өргөө амаржих газрын дарга Ж.Энхцэцэгийг ёс зүйн асуудлаар ажлаас нь чөлөөлсөн билээ. Үүнтэй холбоотойгоор Эрүүл мэндийн сайд С.Энхболд сэтгүүлчдийн асуултад хариулт өглөө.

-Цагдаагийн байгууллагад 20 гаруй жил ажиллаж тэтгэвэртэй гарсан хүн Өргөө амаржих газрын дэд даргаар ажиллаж байна шүү дээ. Энэ хүнийг ажлаас нь чөлөөлөх үү?

    -Өргөө амаржих газрын даргаар Амгалан амаржих газрын дарга Ц.Батболд гэх хүнийг түр томилсон байгаа. Ажлын байран дээр нээлттэй сонгон шалгаруулалт хийгдээд, дараагийн дарга томилогдох хүртэлх хугацаанд ажиллана гэсэн үг. Өргөө амаржих газрын дэд даргаар цагдаагийн байгууллагад 20 гаруй жил ажиллаж, гавьяаныхаа амралтад гарсан хүн энэ оны долдугаар сараас эхлэн ажилласан байна. Мөн өөрийнх нь хуулийн зөвлөх гээд мөн цагдаагийн байгууллагад ажиллаж байсан хүнийг авч ажиллуулсан байгаа. Эдгээр хүмүүсийг ажлаас чөлөөлнө. Мөн Улсын нэгдүгээр төрх эмнэлэгт тодорхой албан тушаалтнууд бий. Энэ хүмүүстэй хариуцлага тооцож байгаа.

-Мэргэжлийн бус хүмүүсийг томилсон байна шүү дээ. Ямар үндэслэлээр томилсон юм бол?

    -Үндэслэл нь тухайн байгууллагын дарга өөрөө албан тушаалтнаа томилдог. Эрүүл мэндийн сайд тухайн байгууллагын даргыг томилдог. Гэхдээ цагдаагийн байгууллагын хүн эрүүл мэндийн байгууллагад ажиллана гэсэн тодорхойлолт байдаггүй. 

-Ж.Энхцэцэг даргыг ёс зүйн алдаа гаргасан гээд ажлаас нь чөлөөлсөн. Гэтэл өөрөө “Би бол ёс зүйн алдаа гаргаагүй, шүүгдэнэ” гэдэг хариуг өгсөн шүү дээ?

      -Хэвлэл мэдээллээр гараад байгаа бичлэг бол 2021 оны долдугаар сарын бичлэг. Эмчлүүлэгчийн хажууд албан хаагчаа загнан ёс зүйн алдаа гаргасан. Эрүүл мэндийн яамны харьяанд энэ гурван төрөх газрыг авсан учир нь өмнө нь мөн ийм асуудал гарч байсан. Иймээс энэ алдаа дутагдлыг арилгах зорилгоор яамнаас харьяандаа авсан. Ж.Энхцэцэг даргын хувьд яамны харьяанд ирээд есөн сар болсон хугацаанд ёс зүйгүй үйлдлүүд ажилчдаас нь нэлээд гарсан. Дээрээс нь яамнаас очсон хяналт шалгалтыг ороход камертай өрөөнд оруулж, дотроос нь ярилцлага авахад буцааж дуудаж дарамталсан асуудал гарсан. Энэ бол ёс зүйгүй үйлдэл.

-Бусад ёс зүйн асуудал хяналт шалгалтаар илэрсэн зүйл бий юу. Тухайлбал, ээжүүдийг төрөхөд нь мөнгө өгсөн, өгөөгүйд нь ялгаварлан гадуурхаж байгаа асуудал байгаа шүү дээ?

      -Энэ бүх асуудлыг сайжруулахын тулд Эрүүл мэндийн яам болон Засгийн газраас эх барих эмэгтэйчүүдийн чиглэлээр илүү анхаарч ажиллаж байна. Хөрөнгө оруулалтыг ч нэмэгдүүлж байна. Мөн ёс бус үйлдлийг илрүүлж, хариуцлага тооцно. Энэ талын гомдол саналыг аваад явж байгаа. Эрүүл мэндийн яамны Дотоод аудитын газраас хяналт шалгалт хийж байгаа.

-Таныг улсын гэх тодотголтой бүх эмнэлэгт найзуудаа томилсон гэх мэдээлэл байна?

       -Би ямар нэгэн албан тушаалд найз нөхдөө томилдог хүн биш. Манай эхнэр өөрөө эрүүл мэндийн салбарын хүн. Эх барих эмэгтэйчүүдийн мэргэжил эзэмшсэн эмч хүн. Ямар нэгэн яамны томилгоонд оролцдоггүй. Намайг сайдын албан тушаалд томилогдоход эхнэр маань ажлаасаа халагдсан. Учир нь Эрүүл мэндийн яаманд эрүүл мэндийн даатгалын хэсэг хариуцсан даргаар ажиллаж байсан. Тиймээс ашиг сонирхлын зөрчил үүснэ гэдэг шалтгаанаар ажлаасаа халагдсан. Одоо гэртээ үр хүүхдэдээ анхаарал тавиад байж байгаа.

-Эрүүл мэндийн яамнаас гарч байгаа бүх баримт бичгийг танай эхнэр хянаж, баталдаг. Өөрөөр хэлбэл, таны цаана ажиллаж байгаа хүн гэж яамныхан өөрсдөө хүртэл ярьдаг юм билээ?

    -Ямар хүн тэгж ярьж байгааг мэдэхгүй. Би өөрийн гэсэн толгойтой, мөн багтай ажиллаж байгаа. Албан тушаал, ямар нэгэн томилгоо шийдвэр гаргахад удирдлагын багаараа хэлэлцэж байгаад шийдвэрээ гаргадаг. Одоогоор эхнэрээсээ асууж зөвлөсөн зүйл байхгүй байна.

-Баянгол дүүргийн Эрүүл мэндийн төвийн даргатай холбоотой ёс зүйн асуудал яригддаг. Гэтэл өнөөдрийг хүртэл албан тушаалаа хашиж байна. Энэ тухайд ямар мэдээлэл өгөх вэ?

     -Есөн дүүрэг, Улаанбаатарт үйл ажиллагаа эрхэлж байгаа өрхийн эмнэлгүүд нийслэлийн эрүүл мэндийн харьяанд босоо удирдлагаар харьяалагддаг. Эрүүл мэндийн яаманд 21 аймгийн таван бүсийн төв, 22 байгууллага босоо удирдлагаар харьяалагддаг. Тэгэхээр ямар нэгэн хариуцлага тооцохын тулд албан бичиг өгнө үү гэхээс хуулиар хариуцлага тооцох эрх нь надад байдаггүй.

-Өргөө амаржих газрын албан тушаалд байгаа хүмүүс өөрсдөө хувийн эмнэлэгтэй гэсэн мэдээлэл бий. Өөрсдөө хувийн эмнэлэгтэй байж болох уу?

     -Хувьдаа эмнэлэгтээ байж болно. Гэхдээ ажлын бус цагаар тухайн эмнэлэгтээ ажиллах эрх нь хуулиар нээлттэй байгаа. Ажлын цагаар ажиллавал хариуцлага тооцно.