Говийн намар өөрийн гэсэн өнгөтэй. Энэ өнгө, энэ мэдрэмжийг Дорноговь аймгийн уран бүтээлчид үг, үсэг, хөг эгшиг, өнгө будаг, камерын дуранд хэрхэн буулгасныг “Урланд ирсэн намар” үзэсгэлэнгээс үзэх боломжтой. Өнгөрөгч амралтын өдөр “Урланд ирсэн намар-4” уран бүтээлийн үзэсгэлэн Дорноговь аймагт нээлтээ хийлээ.

Дорноговь нутгаас төрөн гарсан яруу найрагч, хөгжмийн зохиолч, зураач, гэрэл зурагчин гэсэн дөрвөн салбарын 30 гаруй уран бүтээлч намарт зориулсан шив шинэхэн бүтээлээ олон нийтэд толилуулж байна. Дөрвөн холбооны уран бүтээлчид нэгдэж, тус тусын нүдээр харж, мэдэрч, өөр өөрийн хэлээр өгүүлсэн бүтээлээрээ оролцож байгаа нь энэ үзэсгэлэнгийн гол онцлог байлаа.

Танхимд улаан хөшиг дээр “Урланд ирсэн намар” гэсэн бичгийг эсгийгээр хайчилж хийгээд, гэрэл унжуулсан нь маш бүтээлч харагдав. Учир нь одоо гараар юм хийхээс илүүтэй олон төрлийн хэвлэл ашиглах нь олонтой. Үзэсгэлэнгийн хананд өлгөсөн уран зураг, гэрэл зураг, тэдгээрийн дунд байрлуулсан монгол бичгээр таталган бичсэн шүлэг гээд бүх зохиомж нь үзэгчийг намарт саатуулах шиг. Зураачдын бийрэнд намрын шаргал, улбар өнгө тод, дулаахан буужээ. Гэрэл зурагчдын дурангаар говийн уудам тал, хүн ба байгалийн араншинг буулгасан байна. Яруу найрагчдын бадаг шүлгэнд намар уйтгар, дурсамж, сэтгэлийн нам гүм болж хувирна. Харин хөгжмийн зохиолчдын нот, аялгуунд хөг эгшиг болж, дуу, хуур болж хүний сэтгэлд хүрнэ. Нэг ёсондоо энэ намрыг харах, сонсох, унших гээд олон мэдрэмжийг нэг дор цогцоор нь мэдрэх боломжтой юм.

Нээлтийн үеэр Музей, сургалт, судалгааны төвийн захирал А.Уранжаргал музейн нийгэмд гүйцэтгэх үүргийг онцоллоо. Тэрбээр “Музей бол соёлын үнэт өвийг хадгалж хамгаалж, түгээн дэлгэрүүлдэг байгууллага. Энэ бол зөвхөн өнгөрсөн цагийн тухай яриа биш. Харин хамгийн гол зорилго бол өнөөдөр, энэ цаг үед бүтээл туурвилаа хийж буй уран бүтээлчдийн бүтээлийг өнөө цагийн үзэгчдэд нь хүргэх, гүүр болох гол байгууллага юм” хэмээн хэллээ.

Музейг ихэвчлэн эртний эд өлгийн зүйл, өнгөрсөн цагийн гэрч гэж төсөөлдөг. Харин энэ өдөр музейн танхимд өчигдөр бичсэн шүлэг, саяхан дарсан гэрэл зураг дэлгэгдэж, шинээр зохиосон аялгуу эгшиглэж байлаа. Өв гэдгийг өнөөдөр бүтээж үзэгчдэд хүргэж болохыг үзэсгэлэнгээс харах боломжтой.

Жилээс жилд цар хүрээгээ тэлж буй үзэсгэлэнд энэ удаа “Дорнын говийн аялгуу урлаачид” холбооны хөгжмийн зохиолчид оролцож буйгаараа онцлог юм. Ингэснээр үг, өнгө, дүрслэлийн хажууд аялгуу нэмэгдэж, үзэсгэлэн илүү бүрэн дүр төрхтэй болжээ.

Монголын зохиолчдын “Хурмаст тэнгэр” төвөөс яруу найрагч Х.Цэрэндорж, Б.Лхагвадорж, Э.Эрдэнэдалай, Э.Анхбаяр, Д.Эрдэнэзулай, С.Бэрцэцэг, М.Ганбаатар, Б.Уянга нар шүлэг бүтээлээрээ оролцлоо. Тэдний олонх нь МЗЭ-ийн шагнал, Г.Сэр-Одын нэрэмжит шагнал, “Мөнгөн цом”, “Алтан өд” зэрэг шагналын эзэд юм.

“Дорнын говийн аялгуу урлаачид” холбоог МУУГЗ, ОХУ-ын Буриад Улсын соёлын гавьяат зүтгэлтэн Д.Нацагдорж, МУГЖ Н.Лантуу, МУУГЗ Б.Мөнгөн-Өлзий, МУСГЗ, морин хуурч Х.Болдбаатар төлөөлж байна. Мөн МУУГЗ, хөгжмийн зохиолч Ш.Өлзийбаяр, нэрт морин хуурч, МУСТА Ч.Банзрагч, Ц.Жагдал, Д.Пунцагбал нар оролцов.

“Дорнын говийн тусгал” гэрэл зурагчдын холбооноос сэтгүүлч, гэрэл зурагчин Ш.Энхбаяр, Х.Эрдэнэбулган, Ч.Энхбаатар, Д.Лхагвасүрэн, П.Нямцэцэг, Г.Ганбаяр нар уран бүтээлийн дээжээ дэлгэлээ.

МУЭ-ийн Дорноговь дахь салбараас МУСТА, зураач Л.Халзан, Ц.Адъяасүрэн, Б.Үлэмжбат, Д.Ганпүрэв, Б.Түвшинтөр, Б.Даваадаш, Б.Мөнхжаргал, Э.Батхуяг нарын бүтээл тавигджээ.

Намар цаг нүд ирмэхийн зуур л өнгөрдөг. Энэ хоромхон агшинд нэг л мэдэхэд тал шаргалтаж, шувууд буцах цагт уран бүтээлчид намраас юуг авч үлдсэнийг ирж үзээрэй. Үзэсгэлэн Дорноговь аймгийн Музей, сургалт, судалгааны төвийн танхимд энэ сарын 10-ныг хүртэл дэлгэгдэх юм.

Гэрэл зургийг: "Дорнын говийн тусгал" ГЗХ