Бэлгийн замын халдварт өвчний талаар ХӨСҮТ-ийн ДОХ/БЗДХ-ын тандалт судалгааны албаны дарга Ж.Даваалхамаас тодрууллаа.

 Тэрбээр “2021 оны жилийн эцсийн байдлаар 9309 буюу 1.6 хувийн бэлгийн замын халдварт өвчин бүртгэгдсэн. Энэ нь 2020 онтой харьцуулахад, 617 өвчлөлөөр буюу 1.7 хувиар буурсан байна. Нийт бүртгэгдсэн 9309 тохиолдлын 38.7 хувь нь тэмбүү, 32.5 хувь нь заг хүйтэн, 28.6 трихомониаз, 0.2 хувь нь ХДХВ/ДОХ-ын өвчлөл эзэлж байна. Харин он гараад бэлгийн замын өвчний 741 тохиолдол бүртгэгдлээ. Батлагдсан тохиолдлыг өнгөрсөн оны нэгдүгээр сартай харьцуулахад, 234 тохиолдлоор буурсан байна” гэв.

-Тэмбүүгийн өвчлөл Баянхонгор, Сүхбаатар, Хөвсгөл, Дорнод аймагт өндөр бүртгэгдэж байна-

  Мөн тэрбээр “Орон нутагт мөн өвчлөл бүртгэгдэж байгаа. Тухайлбал, тэмбүүгийн өвчлөл өнгөрсөн жилийн дундажтай харьцуулахад, Баянхонгор,Сүхбаатар, Хөвсгөл, Дорнод зэрэг аймагт өндөр бүртгэгдэж байна. Өөрөөр хэлбэл, бэлгийн замын халдварт өвчин орон нутагт улсын дунджаас бага бол нийслэлд улсын дунджаас их байна. Сүүлийн хоёр жилийн хугацаанд цар тахлын улмаас кабинетаар үйлчлүүлэх иргэдийн тоо багассан. Мэдээж олон удаагийн хөл хориотой байсан болохоор бэлгийн замын халдварт өвчний илрүүлгийн хувьд харьцангуй бага байсан байж магадгүй. Гэхдээ сүүлийн арван жилийн хугацаанд бэлгийн замын халдварт өвчин хэвийн, буурсан үзүүлэлттэй байна. Нөгөө талаар бид 2019-2021 он хүртэл “Тэмбүүг устгая” нэртэй аянг улс даяар өрнүүлж, тэмбүүгийн 10 гаруй мянган өвчнийг илрүүлсэн” гэв.