Яг л монголчууд олимпод алтан медалийн төлөө өрсөлдөж байгаа юм шиг догдолсон, айсан, бахархсан мөчийг Physical Asia шоуг үзэхдээ мэдэрлээ. Монгол хэлээ дэлхийн алдарт Netflix болон БНСУ-ын продюсер Jang Ho‑Gi-ийн хамтын бүтээл Physical Asia шоу дээрээс сонсохдоо жаахан хүүхэд шиг л баярлаж, бахархсан байхдаа, монголчууд. Улсын арслан Б.Орхонбаяраар ахлуулж, эх орноо төлөөлөн эр зориг, бяр тэнхээ, багийн ажиллагаагаа гайхуулахаар ирсэн манай тамирчдыг харсан бусад улсын багийнхан монголчуудын бие бялдар, хүч тэнхээний талаар ам уралдан ярьж, өрсөлдөхөөс эмээж буйгаа ярьсаар байлаа. Монголчууд ч даруухан мэндэлчхээд, зөвхөн ялах зорилготой байгаагаа илэрхийлсээр шоу эхэлсэн юм.

         Тус шоуны өмнөх улиралд өөр, өөр төрлийн 100 тамирчин өрсөлдөж байсан бол энэ удаагийн Physical Asia шоугаар найман улсын тус бүр зургаан гишүүнтэй баг эх орныхоо өмнөөс өрсөлдөж, ялсан баг нэг тэрбум вонтой гэртээ харих юм. Монголчууд Өмнөд Солонгос, Япон, Тайланд, Индонез, Австрали, Турк, Филиппин Улсын тамирчидтай өрсөлдөж байгаа. Тус шоу монголчуудын хувьд онцгой байгаа дахин нэг шалтгаан нь хамгийн анхны монгол хадмал орчуулгатай Netflix-ийн шоу болж байгаатай нь холбоотой билээ.

ТАЛ НУТГИЙН АВАРГУУД "МОРИНДОО"

Physical Asia шоуны эхний дөрвөн анги цацагдаж, багууд эхний хоёр даалгавраа биелүүлэн билээ. Монголчууд даалгаврын өмнө өөрсдийгөө зоригжуулан “Дайчид мориндоо” хэмээгээд нум сум харваж буй мэт үйлдэл хийж байгаа. Эхний хоёр даалгавраа тун амжилттай биелүүлсэн манай багийнхан зөөсөн ачааныхаа хэмжээгээр эхний гутгаар байрт эрэмбэлэгдсэн. Бусад улсын тамирчдын сүрдэж, өрсөлдөхөөр эмээж буй Монголын багийн тамирчдыг танилцуулж байна.

БАГИЙН АХЛАГЧ, УЛСЫН АРСЛАН Б.ОРХОНБАЯР

          Үндэсний бөхийн зодог, шуудгаа өмсчхөөд Physical Asia шоуны хаалгаар багаа ахлан орж ирсэн Улсын арслан Б.Орхонбаяраас шоуны бусад оролцогчид сүрдэж байлаа. Тэрбээр Сэлэнгэ аймгийн Цагааннуур суманд 1998 оны долдугаар сарын 1-нд төрсөн, 95 кг жинтэй, 180 см өндөр. Б.Орхонбаяр 2019 онд Төрийн наадамд 21 насандаа анх удаа барилдахдаа улсын начин цол хүртсэн. Үндэсний бөхийн анхны цол нь Сумын заан байв. Уг цолыг тэр 2016 онд хүртэж байжээ. Түүний багш нь Улсын харцага Түвдэндоржийн Өсөх-Ирээдүй билээ. Б.Орхонбаяр нь "Таван Хан" дэвжээ, "Алдар" спорт хороо, "Атар трейд" ХХК-ийн харьяат бөх юм. Тэрбээр улсын арслан болохдоо тавын даваанд аймгийн арслан Б.Бадамгаравыг, зургаагийн даваанд аймгийн арслан О.Цэцэнцэнгэлийг, долоогийн даваанд улсын арслан Ц.Содномдоржийг, наймын даваанд улсын заан болсон Б.Бат-Өлзийг, есийн даваанд даян аварга Н.Батсуурийг өвдөг шороодуулсан юм. Тэрбээр Сэлэнгэ нутгаас мэндэлсэн гурав дахь улсын арслан цолтон юм.

Түүний аав Н.Баярсайханы “Б.ОРХОНБАЯРЫН ААВ Н.БАЯРСАЙХАН: ХҮҮ МИНЬ АРД ТҮМНИЙ АМНЫ БИЛГЭЭР УЛСЫН АВАРГА БОЛЖ, ОЛОН САЙХАН БАРИЛДААНААРАА ҮЗЭГЧ ТҮМНЭЭ БАЯСГААСАЙ ГЭЖ ХҮСДЭГ” ярилцлагыг энд дарж уншаарай

ХОЛИМОГ ТУЛААН Б.ЭНХ‑ОРГИЛ

Б.Энх-Оргил нь 1988 онд Ховд аймагт төрсөн ба ээж нь сувилагч, аав нь тээврийн жолооч мэргэжилтэй бөгөөд ах, охин дүүгийн хамт Ховд аймагт өсжээ. Тэрбээр тулааны спортоор 2009 оноос хичээллэж эхэлсэн. Аварга биеийн тамирын дээд сургуульд бодибилдинг, фитнесийн дасгалжуулагч мэргэжлээр суралцаж, төгссөн. Road to ONE Mongolia шоуны ялагч, ONE Championship-ын тамирчин "MGL-1" Холбооны 66 кг жингийн хошой аварга, Б.Энх-Оргил One Championship-ын рингэнд нийт зургаан тулаан хийсэн ба тав ялж, нэг ялагдсан юм.

3Х3 САГСАН БӨМБӨГИЙН ҮНДЭСНИЙ ШИГШЭЭ БАГИЙН ТАМИРЧИН Э. ДӨЛГӨӨН

Тэрбээр 1992 оны тавдугаар сарын 27-нд төрсөн, 194 см өндөртэй юм. Түүнийг орон зай нөхөх, хамгаалалт, довтолгоо, холбогч, шидэгч гээд багийн тоглолтын найруулгыг хийх чадвартай тэгш тоглолттой тоглогч хэмээн монголчууд үнэлдэг. Ази тивийн аварга аварга шалгаруулах тэмцээнд Монгол Улсын эрэгтэй шигшээ баг анх удаа алтан медалийн эзэн болоход Ази тивийн үнэ цэнэтэй тоглогчоор Э.Дөлгөөн нэрлэгдэж, цом гардан авч байжээ.

МОНГОЛЫН ВОЛЕЙБОЛЫН СПОРТЫН АНХНЫ ЛEГИОНEР ТАМИРЧИН Г.ХАНДСҮРЭН

Тэрбээр Монгол Улсын Хөдөлмөрийн баатар Х.Баянмөнх аваргын ач, Улсын гарьд Б.Гантогтохын охин бөгөөд Японы дээд лигт уригдан тоглосон монголын анхны волейболын тамирчин юм. Спортын мастер Г.Хандсүрэн 185 см өндөр,  2018 оноос хойш “Хасу CUP”, “Тэнүүн Огоо CUP”, Волейболын холбооны цом, Үндэсний дээд лиг гэх мэт томоохон тэмцээнүүдэд медальт байрт шалгарч байлаа. Мөн Японы оюутны дээд лигийн хошой мөнгө, "Бүх Японы аварга" шалгаруулах тэмцээний дөрөвдүгээр байрт багаараа шалгарч байсан. Японы дээд лигийн хоёрдугаар дивизоны “Брийт Хамамацү” багт легионер тоглогчоор тоглож байв.

УРАН НУГАРААЧ Э.ЛХАГВА-ОЧИР

МУГЖ, уран нугараач Э.Лхагва-Очир нь 1997 оноос хойш уран нугаралтаар хичээллэсэн бөгөөд 2016 онд “Сити” их сургуулийн кино драмын ангийг жүжигчин мэргэжлээр төгссөн. Тэрбээр Найман метрийн өндөр хамгаалалтгүйгээр уран нугаралтын үзүүлбэр үзүүлдгээрээ цор ганц нэгэн. Түүний амжилтууд

• Монте Карлогийн Олон Улсын 16 дахь удаагийн өсвөрийн циркчдийн наадам /Хүрэл цом, Чарли Чаплиний нэрэмжит тусгай цом/ Монако вант улс 2004 он
• Ханой Олон Улсын Циркийн 4 дүгээр Их Наадам /Алтан цом/ Вьетнам улс 2012 он
• Хүэ Олон Улсын Соёлын Наадам /Тусгай шагнал/ Вьетнам улс 2012 он
• Лиана Орфэйн нэрэмжит Олон Улсын Циркийн 29 дэх удаагийн Алтан Наадам /Мөнгөн цом/ Итали улс 2013 он
• Монголын Залуучуудын Холбоо /Тэргүүний Залуу Алтан медаль/ 2012 он
• Монгол улсын Соёлын Тэргүүний Ажилтан /цол, тэмдэг/ 2012 он
• “Ододтой бүжиглэе 3” шоу – TV5 телевиз – /2 дугаар байрын шагнал/ Монгол улс 2012 он
• Монгол Улс 2013 он /Нарны циркийн Кристаль шоу. Сандлын тэнцвэрийн үзүүлбэр.
• Монголын Алиалагчдын тэмцээн / Мөнгөн цом – Вашингтон хот 2018 / жүжигчин Хишиг-Өлзийн хамт / 2010 он
• “Ирээдүйн Мистер 2020” /Эрэгтэй Фитнэсс төрөлд Алтан медаль/ – Монголын Бодибилдинг Фитнессийн холбоо
• Төрийн дээд шагнал “Алтан Гадас” одон медаль, 2021 он
• WBPF Бодибилдинг, Фитнесийн 12 дахь удаагийн Дэлхийн Аваргын тэмцээн /Эрэгтэй Фитнест төрөлд “Алтан медаль”/ Узбекистан улс 2021 он
• “Монголын Мистэр 2021” тэмцээн /Эрэгтэй Фитнес төрөлд “Алтан медаль”/
•  Champ Cup 2021 тэмцээн /Эрэгтэй Фитнес төрөлд “Мөнгөн медаль”/ Монгол улс
• 14 дэх удаагийн Будапештын циркийн наадам “Будапештын тусгай цом” Унгар улс, 2022 он

Түүний Эргэлт.мн мэдээллийн сайтад өгсөн “Э.ЛХАГВА-ОЧИР: МОНГОЛ ХҮН Л НАЙМАН МЕТРИЙН ӨНДӨРТ ХАМГААЛАЛТГҮЙ УРАН НУГАРЧ ЧАДНА” ярилцлагыг энд дарж уншаарай

ЖҮДОГИЙН ШИГШЭЭ БАГИЙН ГИШҮҮН А. АДЪЯАСҮРЭН

        Азийн наадмын хүрэл медальт, Их дуулга тэмцээнүүдээс хоёр мөнгө, гурван хүрэл медаль хүртсэн ОУХМ Амарсайханы Адьяасүрэн. Тэрбээр 2014 оны есдүгээр сараас Спортын төв сургуулийн Г.Эрдэнэбат багшийн удирдлага дор анх жүдогоор хичээллэж эхэлжээ. Түүний Эргэлт.мн сайтад өгсөн “А.АДЪЯАСҮРЭН: Тамирчин хүнд ялж, ялагдах үе зөндөө л гарна” ярилцлагыг уншаарай.