Монгол Улсын Ерөнхийлөгчийн санаачилсан “Тэрбум мод үндэсний хөдөлгөөн”-ий хүрээнд Дархан-Уул аймаг 2021 онд “Ногоон Дархан-2032” хөтөлбөрийг гурван зорилт 14 арга хэмжээтэй төлөвлөн нийт 20 сая мод тарьж ургуулах амлалттай. “Ногоон Дархан-2032” хөтөлбөрийг хэрэгжүүлж эхэлснээс хойш 2.816,.681 ширхэг мод тарьж, зохих арчилгаа, хамгааллын ажлыг гүйцэтгэж байна.

    Өнөөдөр 2026 оны аравдугаар сарын 23-ны өдөр мод тарих ажлыг өргөжүүлэхээр Дархан-Уул аймгийн Засаг дарга, Япон Монголын хамтарсан “Мирай Нахиа” ТББ, "ДСЦТС" ХК- тай урт хугацааны гурвалсан гэрээ байгууллаа. Гэрээний хүрээнд “Мирай Нахиа” ТББ нь эхний ээлжид Хонгор суманд 5000га талбайд өөрсдийн хөрөнгөөр шилмүүст модны суулгацаар ойжуулалтын ажлыг хийх юм. Энэхүү ажил ирэх оноос эхэлнэ.

   "Тэрбум мод", "Ногоон Дархан-2032" хөтөлбөрийн хүрээнд БОУАӨЯ, Засгийн газрын хэрэгжүүлэгч агентлаг Ойн газрын дэмжлэгтэйгээр 2023 онд Хонгор сумын нутагт дөрвөн байршилд нийт 215.5 га газарт “Оюу толгой ХХК”-ий хөрөнгө оруулалтаар техникийн нөхөн сэргээлтийг хийсэн байна.

   2025 онд Хонгор суманд 1500 га талбайд ойжуулалтын ажил төлөвлөснөөс “Оюу толгой” ХХК-ий хөрөнгөөр 450 га талбайд 1.125.0 мянган ширхэг тарьц ургуулсан. Хонгор сумын Хургадын аманд уул уурхайн эвдэрч эзэнгүй орхигдсон техникийн нөхөн сэргээлт хийсэн 5 га талбайд биологийн нөхөн сэргээлтийг тус тус хийжээ. Мөн 20 гаруй нэр төрлийн 3 сая 260 мянган тарьц суулгацын нөөцийг бүрдүүлсэн байна.