Азийн зуны пара спортын тав дахь удаагийн наадам аравдугаар сарын 18-ны өдөр Япон Улсын Айчи мужийн Нагоя хотод эхэлсэн билээ. Азийн зуны пара спортын тав дахь удаагийн наадамд 45 улсын 4000 гаруй тамирчин өрсөлдөж байна. Монгол Улсын пара спортын баг, тамирчид спортын 10 төрөлд 44 тамирчин, нэг хөтөч тамирчин, 18 дасгалжуулагчийн бүрэлдэхүүнтэй өрсөлдөж байгаа юм. Өнөөдрийн байдлаар Монгол Улсын тамирчид дөрвөн алт, хоёр мөнгө, нэг хүрэл, нийт долоон медаль хүртээд байна. Цаашид медалийн тоо өсөх магадлал бий. Энэ сарын 24-ний өдөр Д.Сэлэнгээ байт харвааны төрөлд алтан медалийн төлөө өрсөлдөнө. Хөнгөн атлетик, байт харвааны тамирчид медалийн буухиаг үргэлжлүүлэх нь тодорхой болов уу.

У.СҮРЭНЖАВ ТАЕКВОНДО-ГИЙН ТӨРӨЛД АЛТАН МЕДАЛЬ

    Япон Улсын Айчи мужийн Нагоя хотод үргэлжилж байгаа Азийн V пара спортын наадмын таеквондо-гийн төрөлд “Парис-2024” паралимпын аварга, Хөдөлмөрийн баатар, МУГТ Уламбаярын Сүрэнжав түрүүлж, Азийн пара спортын наадмын аварга болсон. Тэрбээр эмэгтэйчүүдийн “K44” ангиллын 52 кг-ын жинд өрсөлдсөн. Тус жинд найман тамирчин тулалдсан юм.  У.Сүрэнжав шөвгийн наймд Индонезийн Риа Юлиантаг 15:0, 13:1-ээр илүүрхсэн бол хагас шигшээд Хятадын Шиан Шаог 2:0, 6:6-гаар ялж, шигшээд Узбекистаны Умида Мамаражабоваг 10:0, 2:0-ээр ялснаар алтан медаль хүртсэн.

Г.БОЛОР-ЭРДЭНЭ ТАЕКВОНДО-ГИЙН ТӨРӨЛД АЛТАН МЕДАЛЬ

  “Парис-2024” паралимпын мөнгөн медальт, дэлхийн тав, Азийн таван удаагийн аварга, МУГТ Ганбатын Болор-Эрдэнэ Азийн пара спортын наадмын хошой аварга болсон. Тэрбээр алтан медалийн төлөө Узбекистаны Кудражон Хайдаровыг 2:1-ээр буулган авсан юм. Эхний үед 22:24-өөр манай тамирчин ялагдсан ч дараагийн хоёр үед 8:8, 20:4-өөр оноогоор илүүрхсэнээр Монголын багийн гурав дахь алтан медалийн эзэн болсон.

Э.СОДНОМПИЛЖЭЭ ПАУЭРЛИФТИНГИЙН ТӨРӨЛД АЛТАН МЕДАЛЬ

   “Айчи-Нагоя-2026” Азийн зуны пара наадмын пара пауэрлифтингийн төрөлд, Үндэсний шигшээ багийн тамирчин, “Токио-2020” паралимпын аварга, Хөдөлмөрийн баатар, МУГТ Энхбаярын Содномпилжээ 107 кг-ын жинд алтан медаль хүртлээ. Тэрбээр эхний захилгадаа 231 кг-ыг, хоёр дахь захилгаараа 236 кг-ыг өргөж, гурав дахь захиалгадаа 246 кг-ыг амжилттай өргөж Азийн пара наадмын хошой аварга болов. Энэ нь түүний Азийн пара спортын наадмын дөрөв дэх медаль бөгөөд өмнө нь нэг алт, нэг мөнгө, нэг хүрэл медаль хүртэж байлаа.

Л.ТУРУУНАА ЖҮДО БӨХИЙН ТӨРӨЛД АЛТАН МЕДАЛЬ

   "Айчи Нагоя 2026" Азийн зуны пара спортын наадмын жүдо бөхийн эмэгтэйчүүдийн -70 кг жинд Лхайжавын Туруунаа түрүүлж, алтан медаль хүртлээ. Тэрбээр Азийн наадмын финалд Япон Улсын тамирчин Нишимура Ацүмиг цэвэр ялж, Азийн наадмын алтан медаль хүртсэн. Тэрбээр 2022 онд Азербайжан Улсын Баку хотод болсон пара жүдо бөхийн дэлхийн аварга шалгаруулах тэмцээнээс мөнгөн медаль, 2025 онд Казахстаны Астана хотод болсон ДАШТ-ээс хүрэл медаль хүртсэнээр пара жүдо бөхийн ДАШТ-ий хос медальтан , анхны Монголын тамирчин болсон билээ.

Т.СУВД-ЭРДЭНЭ ЖҮДО БӨХИЙН ТӨРӨЛД АЛТАН МЕДАЛЬ

    "Айчи Нагоя 2026" Азийн зуны пара спортын тав дахь удаагийн их наадмын жүдо бөхийн эмэгтэйчүүдийн 52 кг-ын жинд Монгол Улсын тамирчин Тогтохбаярын Сувд-Эрдэнэ мөнгөн медаль хүртсэн. Тэрбээр Азийн наадмын алтан медалийн төлөөх барилдаанд Япон Улсын тамирчин Хангай Шизүкад хожигдож, Азийн пара спортын наадмын мөнгөн медалийн эзэн болсон.

Г.ГАН-ЭРДЭНЭ БӨӨРӨНЦӨГ ТҮЛХЭЛТЭЭР МӨНГӨН МЕДАЛЬ

    Азийн пара спортын наадмын хөнгөн атлетикийн тэмцээний эрэгтэйчүүдийн бөөрөнцөг түлхэлтийн “F40” ангилалд Монгол Улсын тамирчин Гансүхийн Ган-Эрдэнэ мөнгөн медаль хүртэв.Тэрбээр энэ жил 18 настай. Монгол Улсын гавьяат дасгалжуулагч Д.Махашири багшийн шавь юм. Г.Ган-Эрдэнэ Азийн пара спортын тавдугаар их наадмын бөөрөнцөг түлхэлтийн төрөлд 10.30 метр түлхсэн амжилтаар мөнгөн медалийн эзэн болсон.

Х.ТАМЕРБЕК ТАЕКВОНДО-ГИЙН ТӨРӨЛД  ХҮРЭЛ МЕДАЛЬ

   Япон Улсын Айчи мужийн Нагоя хотод үргэлжилж байгаа Азийн тав дахь удаагийн пара спортын наадмын таеквондо-гийн төрлийн “K44” ангиллын эрэгтэйчүүдийн 58 кг-ын жинд Хаулетийн Тамербек хүрэл медаль хүртэв. Тэрбээр медалийн төлөөх төлөөх тулаанд тус наадмыг зохион байгуулагч, эзэн орон Япон Улсын  тамирчин Танака Мицүяг буулган авснаар Монголын багийн анхны хүрэл медалийн эзэн болсон.

Д.СЭЛЭНГЭЭ АЗИЙН НААДМЫН АЛТАН МЕДАЛИЙН ТӨЛӨӨ ӨРСӨЛДӨНӨ

   Азийн пара спортын тав дахь удаагийн их наадмын байт харвааны “PI 2” ангиллын эмэгтэйчүүдийн ганцаарчилсан төрөлд Дэмбэрэлийн Сэлэнгээ шигшээд шалгараад байна. Тэрбээр байрлал тогтоох харваанд 564 оноогоор долдугаарт жагссан. Улмаар Д.Сэлэнгээ чансааны дарааллаар учраа таарсан Ираны Бабахабиб Мохадесехыг 6:5-аар буулган авсан юм. Шөвгийн наймд Бхавнаг 6:2-оор илүүрхэж, хагас шигшээд Индонезийн Новера Россыг мөн 6:2-оор ялснаар алтан медалийн төлөө БНХАУ-ын Гао Жи Ханьтай аравдугаар сарын 24-ний өдөр цэц мэргээ сорихоор болсон.