И-спортын “The MongolZ” баг шинэ бүрэлдэхүүнтэйгээр анхны тэмцээндээ оролцож, аваргаллаа. Тодруулбал, тус баг cobrazera буюу У.Анарбилэгийг эргэн авч, шинэ тоглогчоор Nin9 буюу Г.Есөнтөмөрийг элсүүлснээс хойших анхны тэмцээн болох Серби Улсад зохион байгуулагдсан “1win Private Club Season 2” тэмцээнд оролцож, тэргүүлэн 25 мянган ам.долларын эзэд болсон. Тэгвэл үүнтэй холбоотойгоор “The MongolZ” багийн шинэ тоглогч Nin9 буюу Г.Есөнтөмөрийн “hltv”-д өгсөн ярилцлагыг хөрвүүлэн хүргэж байна.

- Анхны тэмцээндээ түрүүлсэнд баяр хүргэе. Энэ амжилтыг гаргана гэсэн хүлээлттэй байв уу?

          - Мэдээж түрүүлэхийг хүсэж байсан. Гэхдээ бодит байдал дээр бидэнд хамт бэлтгэл хийх хугацаа тийм ч их байгаагүй. Тиймээс мап бүр дээр алдаа гаргаж, түүнийгээ тоглолтын явцад засаж залруулахыг хичээсэн. Эцэст нь ялалт байгуулж чадсандаа баяртай байна.

- Танай баг эхлээд “BIG” багт хожигдсон ч дахин учраа таарч, хожиж чадлаа. Тэдэнтэй хийсэн эхний тоглолтоос хойш алдаагаа засаж, тактикаа өөрчилж чадсан уу?

          - Тэгэхийг хичээсэн. Бид өмнө нь Cache мап дээр олон алдаа гаргасан учир түүүнийгээ засахыг зорьсон.. Гэхдээ тэмцээний дундуур зарцуулах цаг хомс байсан. Зөвхөн “BIG” гэлтгүй бусад багын эсрэг ч бэлдэх шаардлагатай байсан.

Алдаагаа засах гэж оролдсон ч хоёр дахь учраан дээрээ Cache дээр алдсан алдаа дахиад л олон байсан гэж бодож байна. Харин бусад мап дээр бидэнд илүү тухтай тоглож чадлаа.

- “The MongolZ” шинэ бүрэлдэхүүнтэй байсан учир энэ тэмцээний аварга багаар тодрох магадлал бага байсан. Энэ нь та бүхнийг бага ч болов дарамтгүй тоглоход нөлөөлсөн үү. Сэтгэл зүйн хувьд ямар байсан бэ?

          - “Дарамтгүй тоглосон” гэж хэлмээргүй байна. Үнэндээ би багийнхаа бусад тоглогчийг бодвол арай нас тогтсон учир дарамт, шахалт төдийлөн мэдэрдэггүй гэж боддог. Нөгөөтээгүүр багийнхан маань ч өөрийнхөө тоглолтод төвлөрөхөд тусалж чаддаг.

- “The MongolZ” багийн нэг хэсэг болж тоглоход ямар байна вэ. Багтаа хэр дасан зохицож байгаа вэ?

          - Мэдээж маш их баяртай байна. Би энэ багт нэгдэхийг хүсэж байсан. Багт хэдийнэ байгаа тоглогчоос өөр үүрэгтэй тоглогч шаардлагатай байсан учир би өөрийн үүрэг, байрлалаа багт нийцүүлэн өөрчилж тоглосон. Одоо ч шинэ үүрэгтээ багагүй дасаж байна. Мап бүр дээр өдөр ирэх бүр улам сайжирч, өнөөдрийнхөөс ч илүүү сайн тоглож чадна гэж бодож байна.

- cobrazera ч мөн багийн бүрэлдэхүүнд эргэн нэгдсэн. Тэрбээр өмнө нь “The MongolZ” багт тоглож байгаад гарсан ч одоо эргэн ирлээ. Одоогийн бүрэлдэхүүний тоглогчид хоорондоо хэр сайн зохицож байгаа вэ?

- Сайн зохицож байгаа. Бид нэг баг болж хожиж байхад яагаад зохицохгүй байна гэж (инээв)…

          Бидэнд энэ багаараа бэлтгэл хийх хугацаа тийм ч их байгаагүй учир олон зүйлийг тоглолтын явцдаа засаж, сайжруулж байгаа. Хэдий засаж, сайжруулж байгаа ч хожиж, цаашид үргэлжлүүлэх боломжийн түвшинд тоглож байна. Маш сайн гэж хэлэхгүй ч ялалт байгуулахад хангалттай тоглолт гаргаж байгаа. Тиймээс ч энэ бүрэлдэхүүнээрээ илүү том амжилтад хүрч чадна гэж бодож байна.

- Энэ багт нэгдэх санал анх хэрхэн ирсэн бэ. Санал хүлээж авах үед ямар мэдрэмж төрж байв?

- Өмнөх тэмцээнүүдэд багийн амжилт тааруу байсан учраас бүрэлдэхүүндээ өөрчлөлт оруулж магадгүй гэж таамаглаж байсан. Тиймээс энэ санал миний хувьд гэнэтийн зүйл байгаагүй.

          Санал ирэхээс өмнө бид хоорондоо нэлээн ярилцсан. Би “Энэ багийнханд хэрэгтэй, ялалт авчрахад тусалж чадах тоглогч нь байж чадна” гэсэн итгэлтэй байсан. Тиймээс ч тохиролцоонд хүрч, “The MongolZ” багт нэгдэх болсон.

- Энэ тэмцээний өмнө “The MongolZ” баг VRS чансаагаараа багагүй байр ухарсан. Тэр үед “Major” тэмцээнд оролцох эрхээ баталгаажуулсан гэж үзэж байсан уу, эсвэл энэ тэмцээнд заавал амжилт гаргаж байж эрхээ баталгаажуулах шаардлагатай гэж бодож байв уу?

- Одоо VRS-ийн нөхцөл байдал үнэхээр замбараагүй байна. Багууд харьяа бүсээ сольж, өөрчлөлт хийж байгаа нь нөхцөл байдлыг улам төвөгтэй болгож байна.

          Эхэндээ бүгд биднийг эрхээ баталгаажуулчихсан гэж бодож байсан. Гэтэл дараа нь олон зүйл өөрчлөгдөж, гэнэт хэд хэдэн тэмцээн нэмэгдсэнээр нөхцөл байдал өөр болсон. Гэхдээ VRS чансаа болон түүнтэй холбоотой асуудлаас болж бид тийм ч их дарамт мэдрээгүй.

- Танай багийн чансаа дэлхийн шилдэг 50 багийн жагсаалтаас доошилсон нь цаашдын тэмцээний урилгад нөлөөлнө. Та бүхнийг ойрын хугацаанд хоёр томоохон тэмцээн, мөн жилийн хамгийн том тэмцээн болох “Major” хүлээж байна. Эдгээр тэмцээнд амжилттай оролцож, чансаагаа сэргээснээр ирэх улиралд урилга авах боломжоо нэмэгдүүлж чадна гэж бодож байна уу. Эсвэл ирэх жил илүү хүнд байх болов уу?

          - Дараагийн тэмцээнүүддээ түрүүлнэ гэсэн найдлагатай байна. Бид ердөө хоёр хоногийн дараа дараагийн тэмцээнээ эхлүүлэх учир дахиад л бэлтгэл хийх цаг бага. Мөн өрсөлдөх багууд хэдийнэ бидний энэ тэмцээн дээрх тоглолтуудын бичлэгийг үзэж, тактикийг судалж эхэлсэн байх. Тиймээс энэ удаагийнхаас арай хүнд байх магадлалтай. Гэхдээ бид давж гарч чадна гэж бодож байгаа.

- Өнөөдрийн ялалт энэ бүрэлдэхүүн амжилтад хүрч чадна, чансаагаа эргүүлэн ахиулах боломжтой гэдэгт итгэл өгсөн үү?

          - Мэдээж. Өнөөдөр хожсон ч бидэнд засаж залруулах олон алдаа, сайжруулах зүйл бий. Тиймээс одоогийнхоосоо ч илүү сайн тоглох боломж бидэнд бий гэж бодож байна.

Эх сурвалж: hltv