Хойд аавдаа зодуулж, хүнд гэмтсэн гэх гурван настай хүүгийн хэргийн талаар ЦЕГ-аас мэдээлэл өглөө. Энэ үеэр ЦЕГ-ын Хэвлэл мэдээллийн төвийн дарга Г.Мөнхбаяр “Энэ сарын 6-7-нд шилжих шөнө Баянгол дүүргийн X хорооны нутаг дэвсгэрт байрлах ... дугаар тоотод гурван настай Б нь бусдад зодуулж, Гэмтэл согог судлалын Үндэсний төвд ухаангүй хүргэгдсэн гэх дуудлага бүртгэгдсэн. Шалгалтын явцад Л-ын хамтран амьдрагч Э нь 3-6 настай хүүхэд гэртээ харж үлдэхдээ гурван настай эрэгтэй Б-г зодсон байж болзошгүй нөхцөл байдал тогтоогдсон байна. Гурван настай Б-г түүний төрсөн эх Л, түүний хамтран амьдрагч Э нар эмнэлгийн байгууллагад хүргэсэн байна. Харин Л-ийн хамтран амьдрагч Э нь хүүг эмнэлгийн байгууллагад хүргэсний дараа зугтсаныг цагдаагийн байгууллаас шуурхай эрэн сурвалжилж, холбогдогч Э-г хойшлуулшгүйгээр баривчилж, цагдан хорих арга хэмжээг авсан. Эмнэлгийн байгууллагаас хохирогч хүүгийн биеийн байдал хүнд байгаа гэдгийг мэдээлсэн. Харин цагдаагийн байгууллагаас хүүгийн гэмтлийн зэргийг тодорхойлохоор шинжээч эмчийг тодорхойлсон. Яллагдагч Э нь өмнө нь Эрүүгийн хуулийн 11.6.2-т заасан ял шийтгэл эдэлж байсан бөгөөд тус хэрэгтэй холбогдуулан Эрүүгийн хуулийн тусгай ангийн 11.1, 12.1.4-т зааснаар Эрүүгийн хэрэг үүсгэж, яллагдагчаар татах саналыг Баянгол дүүргийн прокурорын газарт хүргэсэн. Тиймээс Л, Э нар хэргийг нуун дарагдуулж, эмнэлэгт хүргээгүй удсан гэж үзэж байгаа. Шинжээч эмчийн дүгнэлтээр хүүг хүчирхийлсэн эсэхийг тодорхойлно. Тэд нэгдүгээр сараас хамтран амьдарсан гэх мэдээлэл бүртгэгвсэн. Зургаан настай хүү өвөө, эмээтэйгээ аюулгүй байгаа" гэв.