Хойд аавдаа зодуулж, хүнд гэмтсэн гэх гурван настай хүү өчигдөр ГССҮТ-д хүргэгджээ. Түүний биеийн байдал ямар байгаа, ямар эмчилгээ хийж буй талаар ГССҮТ-ийн эмчилгээ эрхэлсэн захирал Р.Гантуяа мэдээлэл өглөө.

Тэрбээр “ГССҮТ-д өчигдөр 09:40 цагт биеийн байдал нь маш хүнд хүүхэд хүргэгдэж ирсэн. Хүүхдэд яаралтай тусламж үйлчилгээ үзүүлж, эмчилгээ хийсэн. Ингэхэд хүүхдийн биеийн байдал хүнд, хавсарсан хүнд гэмтэлтэй, зөөлөн эдийн бяцралтай, сээр, нурууны гуравдугаар нурууны их биеийн хугаралтай, тархины хүнд гэмтэлтэй байсан. Хүүхдэд амьсгалын аппарат зүүлгэж, хоёр дахь өдрөө эмчилж байна. Хүүхдэд шаардлагатай бүх тусламж, үйлчилгээг үзүүлж байгаа. Хүүхдийн хувийн мэдээллийг өгөх боломжгүй" гэв.