Төрийн соёрхолт, Урлагийн гавьяат зүтгэлтэн, Улсын драмын эрдмийн театрын ерөнхий найруулагч Н.Наранбаатарын төрсөн өдөр өнөөдөр тохиож байна. Тэрбээр 2000 онд “Бооцоо” жүжгийг тайзнаа найруулан тавьж, найруулагчийн гараагаа эхэлсэн байдаг. Түүнээс хойш “Надаад тоглосон хайр”, “Жаргах гэж дурладаг уу”, “Дурлахыг хориглоно”, “Чи минийх”, “Шөнө амталсан нулимс”, “Нүцгэн дурлал”, “Хайрын виз”, “Нууц амраг чинь болъё”, “Галзуу дурлалт”, “Төлөөс”, “Нэргүй од”, “Надад өгөөгүй хайр”, “Парисийн дарь эхийн сүм”, “Би эр хүнд хайртай”, “Тэнгэрийн хүү”, “Цэцэрлэгт учирсан хоёр”, “Гамлет”, “Тэр чинь би”, “Ромео Жульетта”, “Бүсгүйн зурвас”, “Анна Каренина” зэрэг 40 гаруй жүжгийг найруулан тавьжээ.

                Мөн тэрбээр 2016, 2017 онд Үндэсний их баяр наадмын ерөнхий найруулагчаар ажилласан.

     2004 онд “Гэгээн муза I” наадмын шилдэг залуу уран бүтээлч шагнал, 2005 онд Г.Доржсамбуугийн нэрэмжит “Арслан” шагналын шилдэг найруулагч шагналыг хүртсэн. Тэрбээр “Театр бол эмчилгээний газар. Эмнэлэгт хүн биеэ оношлуулж, эмчлүүлдэг бол театрт ирээд сэтгэлээ засаж эмчлүүлдэг гэж би боддог. Өнөө цагт мэдлэгтэй, боловсролтой, чадвартай хүн олон байгаа ч сэтгэлтэй хүн цөөн байгаа мэт санагдах болсон. Хүний оюуны цангааг тайлж, соёлын боловсролыг түгээж, зөв суурьтай болгоно гэдэг их хариуцлагатай ажил” гэж ярьсан байдаг. Үнэхээр өөрийн тархи, оюунаас нэрж гаргасан бүтээлээрээ үзэгчдийн оюун санаа, зүрх сэтгэлийн цангааг тайлах их үүргийг тэр хүлээдэг. Ойрдоо харин Н.Наранбаатар найруулагчаас шинэ бүтээл төрөхгүй л байна. Удахгүй цоо шинэ оюуны бүтээлийг дэлгэнэ гэдэгт итгэж байна.