Монгол Улсын “Соёлын элч” Морин хуурын чуулгын "Поэма" мэргэжлийн дан хөгжмийн концерт энэ сарын 17-нд болохоор товоо зарлалаа. Тоглолтод Хөдөлмөрийн баатар, ардын жүжигчин, Төрийн хошой шагналт, хөгжмийн зохиолч Н.Жанцанноров /ТХШ, АЖ, ХБ/, Хөдөлмөрийн баатар, урлагийн гавьяат зүтгэлтэн, Төрийн шагналт, хөгжмийн зохиолч Б.Шарав, Төрийн шагналт хөгжмийн зохиолч З.Хангал, Төрийн шагналт соёлын тэргүүний ажилтан Б.Мөнхболд нарын бүтээлийг эгшиглүүлэх юм. Мөн соёлын тэргүүний ажилтан Ш.Өлзийбаяр, Цэн.Эрдэнэбат зэрэг орчин цагийн Монголын хөгжмийн зохиолчдын морин хуур, найрал хөгжимд зориулсан концертуудыг удирдаач урлагийн гавьяат зүтгэлтэн Д.Түвшинсайхан, Н.Жигжиддорж нар удирдан эгшиглүүлнэ.

    Нэгэн үдэш хөгжмийн тансаг өргөөнд саатан, нүүдэлчдийн соёлын гайхамшигт өв морин хуур хөгжмийн аялгууг мэргэжлийн өндөр ур чадвар бүхий хөгжимчид хэрхэн дуурсгаж, эгшиглүүлэхийг сонордоно уу хэмээн урьж байна. Тоглолт Улсын филармонийн концертын танхимд болно.