“Хөтөлийн цемент шохой” үйлдвэрийн цемент үйлдвэрлэх шугамыг хуурай аргад шилжүүлэн, технологийн шинэчлэл хийж, цемент үйлдвэрлэх хүчин чадлыг жилд 1.0 сая тонн болгон өргөтгөх зорилгоор ажлын хэсэг байгуулжээ. Ажлын хэсгийн 2011 оны дүгнэлтээр “Бейзмент” ХХК-ийг сонгон шалгаруулж, “Хөтөлийн цемент шохой” ТӨХК болон “Бейзмент” ХХК нарын хооронд гэрээ байгуулжээ.

     Монгол Улсын Хөгжлийн банкны Төлөөлөн удирдах зөвлөлийн 2012 оны 44 дүгээр тогтоолоор 61.3 сая ам долларын зээлийг таван жилийн хугацаатай олгох тухай “Зээлийн гэрээ”-г “Бейзмент” ХХК-тай байгуулсан байна. Зээлийн гэрээг үндэслэн Хөгжлийн банкнаас “Бейзмент” ХХК-нд 61.3 сая ам долларын зээлийг олгон, Худалдаа хөгжлийн банк болон Улаанбаатар хотын банкны 39.6 сая ам долларын зээлийг дахин санхүүжүүлж, үлдэх төлбөрийг төслийн бүтээн байгуулалтад зориулан Худалдаа хөгжлийн банкны холбогдох дансанд шилжүүлжээ.

    “Хөтөл” ХХК нь тус банктай байгуулсан Зээлийн гэрээнд заасан “төслийн үр дүнд бий болох хөрөнгө (үйлдвэр) –ийг барилгын ажил дууссанаас хойш  сарын дотор тус банканд барьцаалах” үүргийг улсын комисс ашиглалтад хүлээж аваагүй гэх шалтгаанаар хэрэгжүүлэхээс зайлсхийж, үйлдвэрийг барьцаалах үүргээ биелүүлээгүй аж.

   Улсын комиссын 2020/01-10 дугаартай дүгнэлтээр үйлдвэрийн барилга байгууламжийг ашиглалтад хүлээн авсан хэдий ч компанийн зүгээс газар болон үл хөдлөх эд хөрөнгийг гэрчилгээжүүлэх ажиллагааг удаашруулж, банканд барьцаалах ажиллагаанаас зайлсхийсэн бөгөөд Хөгжлийн банкны санхүүжилтээр баригдсан уг үйлдвэрийн барилга, байгууламжийг “Цемент шохой” ТӨХК нь үйлдвэрлэлийн үндсэн үйл ажиллагаандаа ашиглаж, үр ашгийг хүртэж байна.

    Засгийн газраас өмч хувьчлалыг хүчингүй болгож, “Цемент шохой” ХК-ийг төрийн мэдэлд эргүүлэн авсантай холбогдуулан Хөгжлийн банкны зүгээс зээлийн гэрээний үүргийн гүйцэтгэлийг хангуулах зорилгоор тус үйлдвэрт олгосон зээлийн өр төлбөрт ногдох /хөндлөнгийн аудит болон АТГ-н шинжээчийн үнэлгээгээр/ дүнгээр компанийн хувьцаа, үнэт цаас эзэмших, барьцаалах байдлаар зээлийн төлбөрт тооцон хорогдуулах, үйлдвэрийн үйл ажиллагааны орлогоос төлүүлэх, үлдэгдэл зээлийн өр төлбөрийг “Хөтөл” ХХК-ийн холбогдох буруутай этгээдээс төлүүлэхийг хууль хүчний байгууллагатай хамтран хэрэгжүүлэхийг зорин ажиллаж байна.

   "Хөтөл" ХХК-д анх 61.3 сая ам долларыг санхүүжүүлсэн. Зээл болон зээлийн хүүгийн өр төлбөр төлөгдөөгүй тул тус зээлийг БГД ИХАШШ-д 2022 оны нэгдүгээр сарын 14-нд 103.5 сая ам доллар буюу 294.9 тэрбум төгрөгийг нэхэмжилсэн байна. Шүүх хуралдаан өнөөдрийг хүртэл хариуцагч Хөтөл ХХК-аас хамаарч хойшилж байгаа бөгөөд 2022 оны арванхоёрдугаар сарын 5-ны өдрөөр нэхэмжлэлийн шаардлагыг 108.7 сая ам доллар буюу 372.0 тэрбум төгрөг болгон нэмэгдүүлсэн байна.