Зэвсэгт хүчний 350 дугаар ангийн захирагч, Турк Улсад үүрэг гүйцэтгэсэн эмнэлгийн багийн ахлагч хурандаа Ж.Сүх-Очир мэдээлэл хийлээ.

Тэрбээр "Цэргийн хүмүүс бид тушаалаар үүрэг биелүүлдэг. Энэ үүргээ ямар нэгэн алдаа мадаггүйгээр биелүүлэхийн тулд хичээж ажилладаг. Манай баг Турк Улсыг зорьсноос хойш арван хоногийн хугацаанд 650 орчим хүнд эмнэлгийн тусламж, үйлчилгээг үзүүллээ. Үүний 70 гаруй хувь нь хүүхэд, багачууд байсныг энд онцлох нь зүйтэй. Тэдгээр хүмүүс зөвхөн шархадсан, гэмтсэнээс гадна сэтгэл зүйн маш өндөр сорилыг давж байгаа нь харагдаж байлаа. Гар хөл нь шархдаж, толгой тархи нь хагарсан ч ээж, аав, үр хүүхэд, элгэн саднаа нуранги доороос хайж олохын тулд ямар их хүч гаргаж байгааг харах сэтгэл эмтрэм. Манай эмнэлгийн баг өгсөн үүрэг даалгаврын дагуу тасалдалгүйгээр 24 цагийн хугацаанд үүргээ гүйцэтгэсэн. Шөнийн цагт ч өвчтөнүүд олноор ирж эмчлүүлж байсан. Тэдний ихэнх нь юу болоод байгааг ч ойлгохгүй хэмжээнд хүртлээ ослын гүн шокод орсон байв. Энэ хүнд нөхцлийг үл ажран эмч, сувилагч нар маань өөрсдийн ур чадвараа дайчлан ажилласан" гэв.