Залуу уран бүтээлч Noubold буюу Э. Оюунболдыг бид хит болсон олон дуун дээр хамтарч ажилласнаар нь танина. Өөрийн мэдрэмжээ дуундаа шингээж, хадгалж үлдэхийг хичээдэг түүнтэй ярилцлаа.

-Танд энэ өдрийн мэнд хүргэе. Анх уран бүтээлч болохоор шийдсэн үеэс нь яриагаа эхлэх үү?

                -Багаасаа дуучин болно гэж огт бодож байгаагүй ээ. Дуучин болсон шалтгаан нь 3-4 жил бүжиглэсэнтэй холбоотой. Нэг мэдэхэд л хөгжим их сонсдог болчихсон байсан. Тухайн үеийн дуу хөгжим их нөлөөлсөн хэрэг л дээ.

-Яагаад тайзны нэрээ Noubold гэж сонгосон юм бэ?

                -Намайг Э.Оюунболд гэдэг. Noubold гэдэг Шинэболд болон Оюунболд гэсэн утгыг илэрхийлдэг. Жинхэнэ нэрээ аль болох уран бүтээлч, өвөрмөцөөр хөврүүлэх гэж үзсэн л дээ.

-Анхны уран бүтээлээ хэзээ гаргаж байсан бэ. Дуугаа цахим сүлжээнд оруулсны дараах сэтгэгдэл ямар байсан бэ?

                -2021 онд анхны дуугаа гаргаж байсан. Тухайн үед өөртөө жаахан итгэлгүй байсан даа. Гэхдээ бодож байгаагүй хандалт ирсэн учраас үнэхээр уран авсан. Тэр утгаараа анхны дууныхаа нэрээр эхний цомгоо нэрлэж, 2022 оны нэгдүгээр сард гаргаж байлаа.

-Дууныхаа үгийг өөрөө зохиодог уу. Дуугаараа дамжуулж юу илэрхийлэхийг боддог вэ?

                -Дууныхаа үгийг өөрөө зохиодог. Гэхдээ хүн ухаж, ойлгох далд утга шингээе гэж боддоггүй. Тухайн үеийн мэдрэмжээ, тэр цаг хугацаанд нь уран бүтээлдээ шингээх гэж хичээдэг.

-Уран бүтээлчидтэй хамтарч олон дуу гаргасан шүү дээ. Энэ талаар ярихгүй юу?

                -Би Davaidasha, 290, nene, uri mae гэсэн уран бүтээлчидтэй хамтарч дуу хийж байсан. Миний хувьд хамтарч гаргасан уран бүтээлүүд нь илүү сонсогчдод хүрсэн байх. Уран бүтээл хийж байх үеэрээ хамарсан дуучидтайгаа танилцаж, найзууд болоод хамт дуу гаргахаар ярилцдаг. Тэгээд хөгжим, дууны утга санаан дээрээ хамт ажиллаж, тус бүр үгээ бичдэг дээ. Хүмүүстэй хамтарч уран бүтээл хийнэ гэдэг илүү хүлээцтэй байхыг заадаг. Хамтын бүтээл учраас илүү ярилцаж, хэрхэн мэдэрч байгаагаа хуваалцдаг учраас хамтын бүтээл илүү сайхан болж, сонсогчдод хүрдэг.

-Залуу уран бүтээлчид олон болсон шүү дээ. Бусад дуучдаас ялгарах таны онцлог юу вэ?

            -Би поп электро төрлөөр уран бүтээлээ туурвидаг. Дууныхаа дүрс бичлэгийг хялбар аргаар бус илүү урлаг талаас нь харуулахыг хичээдэг. Богино тод өнгийн үсэнд дуртай, надад тухтай, таалагддаг загвараар үсээ засдаг.

-Үлгэр дуурайлал авдаг уран бүтээл байгаа юу?

            -Гаднын уран бүтээлчдээс их үлгэр дуурайлал авдаг. Уран бүтээлчид бүгд дуугаа бүтээх өөрсдийн арга, барилтай байдаг. бусад улсын уран бүтээлчдийн чанарт хүрэхийн тулд их хичээдэг. Уран бүтээлчдээс  Charlie puth, Harry style хоёроос илүү үлгэр дуурайлал авдаг даа.

- Дуу хөгжим таны хувьд юу вэ?

            -Миний хувьд дуу хөгжим бол хүн төрөлхтний оюун ухааны өөр нэгэн сүнслэг увдис юм шиг санагддаг.

-Олны танил болсны дараа сайн, муу хандалт олон ирсэн байх. Тэр бүрийг хэрхэн хүлээж авсан бэ?

          -Би олон хүнтэй газар байхаасаа жаахан эмээдэг. Дотоод сэтгэлээ ойлгож чадаагүй, хэн гэдгээ мэдээгүй яваа нэгэн. Олны танил байна гэдэг тийм хүсэл зүйл биш юм билээ. Би зүгээр л уран бүтээл хийх хүсэл, тэмүүлэлтэй нэгэн.

-Сонсогчидтойгоо уулзсан анхны тайз нь хэзээ байсан бэ. Тайзан дээрээс авсан мэдрэмж ямар байсан бэ?

            -Цомгийн минь нээлт миний анхны тайз байлаа. Намайг мэддэг, дэмждэг хүмүүс байгаа гэдгийг хараад их урам авсан тайз байсан даа.

-Уран бүтээлээрээ дамжуулж сонсогчдодоо ямар мэдрэмж өгөхийг хүсдэг вэ?

            -Зөвхөн сонсогчдод зориулж уран бүтээл хийдэггүй. Тухайн хүн дуунаас минь миний мэдэрсэн мэдрэмжийг мэдэрч байвал болох нь тэр.

-Ирээдүйн зорилго, төлөвлөгөөнөөсөө хуваалцахгүй юу?

            -Миний хувьд 2023 онд “sspiritoj label”-тэй гэрээ хийсэн. Тэгэхээр би ганцаараа бус уран бүтээл хийх багтай болсон гэсэн үг. Илүү чанартай, цагийн хуваарийн дагуу уран бүтээлүүдийг энэ хавраас гаргах болно. Дан ганц монгол улсдаа бус Азийн зах зээлд гаргах зорилготой байгаа. 

-Ярилцлага өгсөн танд баярлалаа.

            -Баярлалаа.