Увс аймгийн Завхан сумын Айраг нуур багийн Үзүүрийн булаг гэх газар Улаангом сумаас Завхан сумын Хэцүү хадны чиглэлд зорчиж явсан суудлын автомашин Хяргас нуурын мөсөнд цөмөрч, живжээ.

    Дуудлагын дагуу аймгийн Онцгой байдлын газрын Эрэн хайх, аврах салбар, Завхан аймгийн Онцгой байдлын газрын Сонгино сум дахь Эрэн хайх, аврах бүлгийн   алба хаагчид ажиллаж,  18 метрийн гүнээс энэ сарын 14-ний өдрийн 17:45 цагт суудлын автомашиныг татан гаргажээ. Алба хаагчид  18 метрийн гүнд шумбалт хийж, автомашиныг гар татлагаар холбон,  50 метр газар хонгил гаргаж мөсийг цэвэрлэн, татан гаргах ажиллагааг зохион байгуулсан байна. Бид Увс аймгийн Онцгой байдлын газрын Эрэн хайх,  аврах ангийн дарга Б.Түвшинжаргалаас тодрууллаа.

-Хяргас нуурын мөсөнд суусан автомашинд хэдэн хүн явсан бэ. Тэдэнд ямар тусламж үзүүлсэн бэ?

         -Энэ сарын 11-нд найман хүнтэй автомашин Хяргас нуур дээгүүр явж байгаад мөсөнд суусан гэх мэдээлэл ирсэн. Бид дуудлагын дагуу алба хаагчид болон шаардлагатай багаж хэрэгслээ авч хөдөлсөн. Ослын газарт Наранбулаг сум хагийн ойр байсан учир тус сумын Эрүүл мэндийн төвд дуудлага өгсөн. Дуудлагын дагуу Наранбулаг сумын эмч нар нуурын мөсөнд  осолдсон иргэдэд анхан шатны тусламж үзүүлж, шаардлагатай арга хэмжээг авч ажилласан. Харин нуурын мөсөнд осолдсон автомашинтай иргэдтэй хамт өөр автомашин явж байсан учир тухайн автомашины жолооч осолдсон иргэдийг Наранбулаг сумын эмч нарт дөхүүлж, хоёр талаасаа уулзсан байдаг.

-Иргэдийн биеийн байдал ямар байгаа вэ. Ус залгисан болон хатгалгаа авсан хүн бий юү?

        -Осолдсон иргэдийг Наранбулаг сумын эмч нар яаралтай аймгийн төвийн Нэгдсэн эмнэлэг рүү шилжүүлсэн. Нэг хүүхдийн биеийн байдал сайжраагүй гэх мэдээлэл бий.

-Мөсөнд суусан автомшиныг ямар аргаар татаж гаргасан бэ?

           -Нуурын эргээс 6-7 километр, 18 метрийн гүнээс автомашиныг татаж гаргаад, түрж голын эрэг рүү дөхүүлсэн. Бид хоёр дахь өдрөө автомашиныг гаргаж чадсан. Автомашиныг голоос гаргахын тулд алба хаагчид 18 метрийн гүн шумбалт хийж, гар татлагаар холбож, 50 метр газар хонгил гаргаж, мөсийг цэвэрлэсэн.  Тэгээд автомашинаар татах боломжтой газар хүртэл түрж, автомашиныг уснаас гаргасан.

-Ослын газар хэдэн алба хаагч үүрэг гүйцэтгэж, ажилласан бэ?

          -Увс аймгийн Онцгой байдлын газраас найм, Завхан аймгийн Онцгой байдлын газрын Сонгино сум дахь Эрэн хайх аврах бүлгийн зургаан алба хаагч хамтран ажиллаж, үүргээ амжилттай биелүүлсэн.

-Та иргэдэд ямар зөвлөгөө, мэдээлэл өгөх вэ?

          - Цаг хожих, зам товчлох зэргээр мөсөн дээгүүр явах, авто тээвэр хийхгүй байх, бага насны хүүхдийг гол, мөрөн, нуурын мөсөн дээр тоглуулахгүй байж болзошгүй эрсдэлээс урьдчилан сэргийлэхийг Онцгой байдлын ерөнхий газраас анхааруулдаг. Энэ сэрэмжлүүлэгийг цаг үргэлж санаж явах ёстой гэдгийг иргэдэд хэлмээр байна.