XVII жарны усан туулай жилийн өнгө, ноён нуруу, Төгс Буянт зурхайн ёсны талаар “Монголын бурхан шашинтны шинэ төв” хийдийн хамба лам З.Санждорж мэдээлэл хийлээ.

Тэрбээр “XVII жарны үзэсгэлэн болгогч хэмээх усан туулай жил морилон ирж байна. Энэ жилийн төлөв байдлын талаар мэдээлэл өгье. Усан туулай жилийн ерөнхий төлөв нь ард түмэн өлсөж, цангах зовлонгүй, өег цатгалан. Элдэв халдварт өвчингүй бие нь зовлонгүй, сэтгэл алжаалгүй сайхан жил болно. Эрх баригчид хууль цаазаа хуулиа ёсчлон баримталж чадваас түмэн олон, ард иргэд аз жаргалтай, баяр цэнгэл наадмаар бялхаж, дуу хуур, эгшиг наадам цуурайтсан жил гарна. Усан туулай жилийн угтаж буян их үйлдэх ёстой.

Байгаль цаг уурын хувьд

Усан туулай жилийн хаврын урь хоёрдугаар сарын 4-д ирсэн. Энэ өдрийн шинж байдлаар үзвэл тэнгэр цэлмэг, торойх үүлгүй, салхи шуургагүй байсан. Тиймээс энэ хавар  цас, мөс эрт хайлна. Хур тунадас цагтаа бууна, галын аюулгүй. Зуны улиралд нийт нутгаар өвс ногооны гарц сайн, дэлгэр сайхан зун болно. Үр тарианы ургац арвин, нарлаг тавтай урт намар болно. Цас багатай өнөтэй сайхан өвөл болох шинжтэй.Нийт ардын хувьд өндөр настанд ээлтэй, идэр залуучуудад ердийн хэвийн, дунд зэрэг, хүүхэд, нялхаст хатуу жил болох магадлалтай. Тахиа жилтнүүдэд хатуу жил болно.

Нийгэм улс төрийн хувьд

Нийгмийн хувьд зөрчил маргаан ихтэй, залуучуудын нийгмийн идэвх оролцоо сайжирна. Улс төрийн тэмцэл хурцадмал, сөрөг хүчний үйл ажиллагаа идэвхэжнэ. Төрийн хууль чангарч, үндсэн хуульд өөрчлөлт орох магадлалтай.Усан туулай жилийн онцлог нь урьд өмнөх туулай жилүүдэд болж байсан түүхэн үйл явдал давтагдах шинжтэй. Тухайлбал, бурхны шашны шинэчлэл томоохон үйл явдал болно. Уламжлалт түүх соёлын олон амжилт гарна. Дэлхийд алдартай зочин ирж, аялал жуулчлалын үйл ажиллагаанд амжилт гарна. Хууль бус үйл ажиллагаа ил болж, томоохон хэргүүд эцэслэн шийдвэрлэгдэнэ. Улс орны эдийн засаг сэргэж, ашиг орлого нэмэгдэнэ” гэв.