“Үзэсгэлэн болгогч” хэмээх туулай жилийн сар шинийн баярыг угтаж, Баянзүрх дүүргийн 13 дугаар хорооны аж ахуй нэгжүүдийн дарга нар ахмадууддаа хүндэтгэл үзүүллээ.

            Биднийг очиход хорооны ажилчид өнгө өнгийн дээлээр гоёж, бүсгүйчүүд үсээ гоёмсог туузаар боосон байв. Ахмадуудыг хүлээн авах хэсэгт жижгэвтэр идээ зассан байх нь шинийн нэгний өдөр мэт санагдана. Цохилтод хөгжмийн ая эгшиглэж хүндэтгэлийн арга хэмжээ эхэллээ. Жанжин клубийн уран бүтээлчид үе үеийн ардын болон зохиолын дууг дуулах нь сонсголонтой. Дууны ая эгшигт ахмадууд уяран баясаж, нүүрэндээ инээмсэглэл тодруулан, алга ташин бүжиглэх нь юутай сайхан.

     Тус арга хэмжээний үеэр Баянзүрх дүүргийн 13 дугаар хорооны засаг дарга Э.Доржбал "Би хорооны засаг даргаар хоёр дахь жилдээ ажиллаж байна. Өнгөрсөн хугацаанд хорооныхоо иргэдэд зориулан сайн дурын ажил олныг хийсэн байна. Энэ удаад цагаан сарын баярыг угтан ахмадуудаа баярлуулж байгаадаа баяртай байгаа. Баянзүрх дүүргийн хэмжээнд 1500 орчим ахмад настан бий. Өнөөдөр 300 ахмадыг хүлээн авч, урлагийн тоглолт хүндэтгэлийн арга хэмжээ болж байна. Арга хэмжээг манай 13 дугаар хорооны аж ахуй нэгжүүд ивээн тэтгэснээрээ онцлог юм.  Зохион байгуулалтыг ивээн тэтгэсэн болон туслалцаа үзүүлсэн бүх байгууллага, хувь хүмүүст талархал илэрхийлье. Өнөөдрийн арга хэмжээнд ямар нэгэн аж ахуй нэгж байгууллагад харьяалагдаггүй ахмадууд оролцож байгаа" гэв. 

     Хүндэтгэлийн арга хэмжээнд ирсэн ахмадууд залуу, эрч хүчтэй, алсын хараатай даргатай болсондоо баяртай байгаагаа илэрхийлж байлаа.

13 дугаар хорооны ахмад настан "Хорооныхон аж ахуйн нэгжүүдтэйгээ хамтран ахмадуудаа хүлээж авч байгаад  их баяртай байна. Манай хороо жил бүрийн цагаан сараар ахмадууддаа хүндэтгэл үзүүлдэг. Би  13 дугаар хороонд  20 гаруй жил амьдарч байна. Өнөөдрийн арга хэмжээнд оролцож буй энэ сайхан хүмүүсийг хараад, хөгшин миний бие дотроо их баярлалаа. Мөн уулзаагүй удсан хүмүүстэйгээ уулзлаа, олон сайхан ахмадуудаа нэг дор цуглуулсанд талархаж байна. Цагдаагийн байгууллагад мөр зэрэгцэн зүтгэж байсан алба хаагчид болон монголын ард түмэндээ сар шинийн мэнд дэвшүүлье. Сайхан шинэлээрэй" гэсэн юм. Мөн тус хорооны ахмад настан Ж "Жил болгон ийм сайхан арга хэмжээ зохион байгуулдаг хорооныхондоо амжилт хүсье" хэмээн баярласан сэтгэлээ илэрхийлсэн юм.  

        СТА, жүжигчин Б.Даваажав буюу Байлаа тоглолтын төгсөлд тайзнаа гарч, өөрийн амьдралын түүх болон уран бүтээлийнхээ тухай ахмадуудтай ярилцаж, тоглолтоо үзүүлсэн юм. Тэрбээр 13 дугаар хорооны оршин суугч бөгөөд цасан шуурганаас 13 хүний алтан амь аварч байсан гавьяатай гэнэ. Тэр  О.Дашбалбарын “Залуус дүү нартаа хүргэх  шүлэг”,  Б. Лхагвасүрэнгийн “Чамаараа би зөндөө гоё сон” гэх шүлгүүдэд ая зохиож, дуулж сонирхуулсан юм. Мөн аавдаа зориулсан “Ааваа хүү нь аав болсон” уран бүтээлээ хүргэсэн юм. Түүний чин сэтгэлээс гарах аялгуу ахмадуудын сэтгэлд хүрч байв.