Цагаан сарын баяртай холбогдуулан бараа, бүтээгдэхүүний үнийн хөөрөгдлийн талаар ШӨХТГ-ын дарга Ч.Уртнасан,  Шадар сайд С.Амарсайхан нар мэдээлэл хийлээ. 

      Энэ үеэр ШӨХТГ-ын дарга Ч.Уртнасан “Ипотекийн зээлийн нэг хувийн шимтгэлийг хурааж авах нь үндэслэлгүй гэсэн шалтгаанаар Зөрчлийн тухай хуульд заасны дагуу арилжааны есөн банканд 20 сая төгрөгийн торгууль ногдуулсан. Худалдааны лангуу, кассын үнийн зөрүүтэй байдалд стандарт шаардлагыг мөрдүүлж, хэрэглэгчдийг төөрөгдүүлэхгүй  байх нь чухал. Тиймээс хэрэглэгчдийг төөрөгдүүлэхгүй байх ажил 78 хувийн гүйцэтгэлтэй байна. Хэрэглэгчийн эрхийг хамгаалах ажлын хүрээнд зах, худалдааны төв, сүлжээ дэлгүүрүүдтэй гэрээ байгуулан хамтарч ажиллаж байна. Цаг үеийн байдлаас шалтгаалан өргөн хэрэглээний барааны үнэ өмнөх жилийнхтэй харьцуулахад өссөн гэх судалгаа гарсан” гэлээ. 

      Харин Шадар сайд С.Амарсайхан “Улсын хэмжээнд мөрдөгддөг 6000 гаруй стандарт бий. Тэдгээрийг иргэдэд мөрдүүлэх нь чухал байна. Ялангуяа эмнэлгийн стандартыг мөрдүүлэх, түүнд хяналт тавьж, ажиллах хэрэгтэй. ШӨХТГ-ын орон тооны болон орон тооны бус гишүүд хэд хэдэн чухал зүйл дээр төвлөр,  ажиллах ёстой. Өөрөөр хэлбэл, зах зээлд нийлүүлэгдэж байгаа бараа бүтээгдэхүүний чанар, үнэ өртөг, аюулгүй байдалтай холбоотой сэтгэл ханамжийн асуудал нэгдүгээрт тавигдах ёстой. Тиймээс та бүхэн энэ ажлыг эрчимжүүлэх, сайжруулах тал дээр Стандарт, хэмжил зүйн газраас авч хэрэгжүүлж буй арга хэмжээ, Засгийн газрыг бодлоготой хамтарч ажиллах хэрэгтэй. Стандартын ажил, хил гаалиар орж ирж буй бараа бүтээгдэхүүний хяналт шалгалтыг сайжруулж шаардлагатай байна” гэлээ.