Үе тэнгийнхээ дөрвөн охинд зодуулж, нас барсан байж болзошгүй 15 настай охин Ховд аймгийн Жаргалант сумын зургадугаар сургуульд сурч байгаад Насан туршийн боловсролын төв рүү шилжжээ. Талийгаач охин ямар зан чанартай хүүхэд байсан талаар Насан туршийн боловсролын төвийн захирал Д.Бат-Эрдэнэ мэдээлэл өглөө. Тэрбээр “ Талийгаач охин 2022 оны хоёрдугаар сараас Насан туршийн боловсролын төвд суралцаж байсан. Талийгаач хичээлдээ тогтмол явж байсан. Түргэн зантай боловч сэргэлэн, цовоо хүүхэд. Тэрээр сүүлийн өдрүүдэд ангийнхантай дасаж, дотно болж байсан. Хичээлээ тасалдаггүй хүүхэд байсан болохоор хичээлдээ сайн. Мөн талийгаач эрсдэлт бүлгийн хүүхэд хамгааллын хараа хяналтад байсан. Талийгаач охин бидэнд “Намайг хүүхдүүд гадуурхаж, дээрэлхэж байна” гэж хэлж байгаагүй. Сурагчдын амралтын үед талийгаач бусдад зодуулж, бурхан болсон байсан. Нэгдүгээр сарын 30-нд талийгаачийн эгч бидэнтэй холбогдож, охиныг нас барсан болохыг нь хэлсэн. Бид талийгаачийн үеэл болон ар гэрийнхэнтэй нь холбогдсон" гэлээ.