З.БОЛДСАЙХАН ХАРААГҮЙ ХҮМҮҮСИЙН НЭРЭЭР ТӨСӨЛ, ХӨТӨЛБӨРИЙН МӨНГӨ ЗАВШИЖ, ҮНДЭСЛЭЛГҮЙ ХӨРӨНГӨЖСӨН ГЭХ 

     Монголын хараагүйчүүдийн үндэсний хорооны дарга З.Болдсайхан хараагүйчүүдийн нэрээр төсөл хөтөлбөрийн мөнгийг хувьдаа завшиж, үндэслэлгүй хөрөнгөжсөн гэдгийг эх сурвалж бидэнд мэдээлсэн юм.  Тодруулбал, Монголын хараагүйчүүдийн үндэсний хорооны дарга нар олон жил хамаарал бүхий төрийн бус байгууллага, компаниудынхаа дансаар их хэмжээний мөнгө завшиж байгаа гэх. Тухайлбал, Засгийн газрын 2020 оны тогтоолоор хараагүй хүмүүсийн хөдөлмөр, сургалтын үйлдвэр нь Засгийн газрын хэрэгжүүлэгч агентлаг  Хөгжлийн бэрхшээлтэй хүний хөгжлийн Ерөнхий газрын харьяанд “Хараагүй хүмүүсийн хөдөлмөр, сургалт, хөгжлийн төв” улсын төсөвт үйлдвэрийн газар болж, өөрчлөгдсөн байдаг. Тус үйлдвэрийн даргаар ажиллаж байгаа З.Болдсайхан өнөөдрийг хүртэл үйлдвэрийг болон хараагүйчүүдийн холбоог удирдахдаа үйлдвэрийнхээ эзэмшилд байсан газрыг зарж, кадастрыг сольсон гэх. Мөн зарим эд, хөрөнгөө Хөрөнгө орлогын мэдүүлэгтээ дурдаагүй гэдгийг холбооны гишүүд нь ярьдаг. Энэ нь түүнийг үндэслэлгүй хөрөнгөжиж гэдгийг нотлох боломжтой.Мөн тэрбээр  7-8 орон сууцтай, найман нэрийн дэлгүүр, барааны лангуугаа хамаарал бүхий хүмүүсийнхээ нэр дээр бүртгэсэн гэх.

З.БОЛДСАЙХАН: БИ 14 ЖИЛ АЖИЛЛАХДАА НЭГ Ч ГАЗАР ЗАРЖ ҮЗЭЭГҮЙ

    2022 оны арванхоёрдугаар сард холбооны дэргэдэх МСҮТ-н данснаас өөрийн хамаарал бүхий ТББ-н данс руу олон сая төгрөг шилжүүлсэн нь баримтаар буюу хуулиар нотлогдсон гэдгийг хуулийнхан бидэнд мэдээлсэн юм. Мөн түүний хамаарал бүхий этгээдүүд болох МХҮХ-ны Ерөнхийлөгч асан Гэрэл, Баясгалан, Баясгалангийн төрсөн дүү Цэнгэл, Ерөнхий нарийн бичгийн дарга асан Болдбаатар, З.Болдсайханы эхнэр Шинэчимэг болон түүний ажилтан Сумьяасүрэн, МСҮТ-ын захирал Б.Ганзориг нар болон тэдний хамаарал бүхий компани, ТББ, өмчлөлд болон эзэмшилд байгаа газар, авсан төсөл, тендерийг хуулийн байгууллагаас шалгах хэрэгтэй гэдгийг эх сурвалж бидэнд онцолж байсан юм.

     Үүнээс гадна З.Болдсайхан тэргүүтэй дээрх этгээдүүд байгууллагуудынхаа ажилчдын нэр дээр болон эхнэр, хүүхэд, хамаатныхаа дансаар хууль бус мөнгөний гүйлгээ хийдэг гэх. Тиймээс З.Болдсайхан дарга олон жил хараагүй хүмүүсийн боломжийг хулгайлж, бусдын нэрээр мөнгө завшдаг байж болзошгүй талаар Монголын хараагүйчүүдийн Үндэсний холбооны гишүүд гомдол гаргасан байна.

      Дээрх асуудлаар З.Болдсайханаас тодруулсан юм. Тэрбээр "Би Монголын хараагүйчүүдийн үндэсний хорооны даргаар 14 дэх жилээ ажиллаж байна. Өнгөрсөн хугацаанд газар зарж үзээгүй. Манай үйлдвэр нэг га орчим газартай. Манайх 2021 оноос улсын төсөвтэй болсон. Жилд манай холбоонд нэг тэрбум төгрөг төсөлвөлж байгаа. 500 сая орчим төгрөгийг нь татаасаар авдаг. Намайг бусдын нэрээр мөнгө завшсан гэж байгаа бол хуулийн байгууллагад хандах хэрэгтэй" гэв. 

МОНГОЛЫН ХАРААГҮЙЧҮҮДИЙН ҮНДЭСНИЙ ХОРООНЫ ДАРГА З.БОЛДСАЙХАН ХОЁР ОРОН СУУЦ, НЭГ ЗУСЛАНТАЙ ГЭЖ МЭДҮҮЛЖЭЭ

    Тэрбээр 2021 оны хөрөнгө орлогын мэдүүлэгтээ 18 сая төгрөгийн орлоготой, 337 сая төгрөгийн хоёр орон сууц, нэг зуслантай гэж мэдүүлсэн байна. Мөн 2.1 га газартай 30 сая,төгрөгийн үнэт эдлэлтэй, 272 сая төгрөгийн зээлтэй хэмээсэн байдаг.