Сэтгүүлчдийг баривчилсантай холбоотой асуудлаар Эрүүгийн цагдаагийн албаны Зохион байгуулалттай гэмт хэрэгтэй тэмцэх хэлтсийн тасгийн дарга н.Отгонбаатар мэдээлэл өглөө.

      Тэрбээр “Нэгүүн.мн сайтын сэтүүлч Б.Анхбаяртай холбоотой асуудлаар та бүхэнд Прокурорын зөвшөөрсөн хэмжээнд мэдээллийг хүргүүлэх гэж байна.Тухай асуудалд сэтгүүлчийн хэвлэн нийтлэх үйл ажиллагаатай холбоотойгоор мөрдөн шалгах ажиллагаа явагдаагүй. Зөвхөн тухайн иргэнтэй холбоотой асуудлыг бид шалгаж байна.  Иргэн Б.Анхбаяр нь Улаанбаатар хотын нутаг дэвсгэрт үйл ажиллагаа явуулдаг, саун, массажны газарт ажилладаг нэр бүхий эмэгтэйчүүдийн үйл ажиллагаанд шөнийн цагаар бичлэг хийсэн. Ингэхдээ тухайн дүрс бичлэгээ олон нийтэд тараана гэж удаа дараагийн үйлдлээр бусдын эрх, хууль ёсны ашиг сонирхолд ноцтой хохирол учруулж болзошгүй баримт мэдээллийг цахим орчинд тарахаар сүрдүүлсэн байж болзошгүй үйлдэлд Монгол Улсын Эрүүгийн 17.6 дугаар зүйлийн нэг дэх хэсэгт зааснаар бусдын эд хөрөнгийг авахаар заналхийлэх гэмт хэрэгт холбогдуулан шалгаж байна. Мөрдөн шалгах ажиллагаа явагдаж байна. 2023 оны нэгдүгээр сарын 31-ны 21:10 цагт Эрүүгийн хэрэг хянан шийдвэрлэх тухай хуулийн 1.5-т зааснаар сэжигтнийг хойшлуулашгүйгээр баривчилсан. Одоогийн байдлаар Чингэлтэй дүүргийн Прокурорын газарт Б.Анхбаярт холбогдуулан бусдын хууль ёсны эрх ашигт ноцтой хор хохирол учруулж болзошгүй үндэслэлээр хоёр эрүүгийн хэрэгт хоёр удаагийн үйлдэлд нь Эрүүгийн хэрэг үүсгэж яллагдагчаар татах саналыг тавиад, мөрдөн байцаалтын ажил явагдаж байна" гэв.