Монголын сэтгүүлчдийн нэгдсэн эвлэлийн Ерөнхийлөгч асан Х.Мандахбаяртай холбогдуулан өмгөөлөгч Г.Балжмаа мэдээлэл өглөө.

         Тэрбээр “Х.Мандахбаяр гэх хүнтэй 2018 оноос хамтран ажиллаж эхэлсэн. Ингэхдээ миний зүгээс хүлээсэн гэрээ гэвэл Хэвлэл мэдээллийн эрх чөлөөний тухай хуулийн төслийг батлуулах ажилд хамтран оролцох, хоёрдугаарт, сэтгүүлчдийг үнэ төлбөргүй өмгөөлөх, хууль зүйн зөвлөгөө өгөх. Мөн Зөрчлийн тухай хуулийн 6.21-т заасан гүтгэх заалтыг Зөрчлийн хуулиас хүчингүй болгох, хасах ажлыг хамтарч хийх гэрээ байгуулсан. Харин Х.Мандахбаярын зүгээс энэхүү гэрээний дагуу магистрын төлбөр төлөх, хоёр өрөө байр өгч, цалинг сая 500 мянгаас дээш олгох гэрээний үүрэг хариуцлагатай. Ингээд энэ гэрээний дагуу бид өнөөдрийг хүртэл ажилласан ч Х.Мандахбаяр үүргээ биелүүлээгүй. Энэ талаар би удаа дараа хүсэлт тавьдаг байсан ч "Боломжгүй, Чи намайг ойлго" гэх хариуг өгч байсан. Иймээс би 2022 оны арванхоёрдугаар сард гэрээгээ дуусгах саналыг тавьсан. Гэтэл саяхан АТГ-аас нэр бүхий 17 хүний нэрст, Х.Мандахбаярын нэр нь дурдагдсан гээд өмгөөлөгчөөр ажиллаад өгөөч гэсэн саналыг надад тавьсан.

   Гэвч өмгөөлөгчөөр ажиллуулж байгаа хэрнээ надаас баримт материалаа нуух асуудал гаргасан. Мөн "Миний үгээр хууль зүйн туслалцаа үзүүл" гэх шаардлагыг тавьсан. Хариуд нь би "Өмгөөлөгчийн тухай хууль, Эрүүгийн хянан шийдвэрлэх хуулийн хүрээнд ажиллагаа явуулах үүрэгтэй хүн. Ийм байдлаар ажилладаггүй" гэсэн шаардлага тавьснаас үл ойлголцол үүссэн. Мөн үүгээр ч зогсохгүй “Эрхэт Монгол” групп “Оранж” плазагийн дөрвөн давхарт үйл ажиллагаагаа явуулдаг.  Би хажуу талынх нь өрөөнд "Сэрүүлэг" констракшнтай гэрээ байгуулж төлбөрөө төлөөд явж байтал энэ хүмүүс дөрвөн давхарт засвар хийнэ гээд ороод ирсэн. Өчигдөр орой бүр хаалга тогшоод, өрөөгөө суллаж өгөхийг шаардахад нь өрөөгөө суллаж өгсөн. Тэр хүний гоё сайхан үгэнд хууртлаа. Над шиг гоё, сайхан үгэнд нь хууртсан олон залуус бий" гэв.