АТГ-аас цаг үеийн асуудлаар мэдээлэл хийж байна.

       Энэ үеэр  АТГ-ЫН Мөрдөн шалгах хэлтсийн ахлах мөрдөгч Б.Батбилэг  “Нүүрсний хулгайтай холбоотой гэгдэх хэрэгт эрх мэдэл албан тушаалын байдлаа урвуулан ашигласан, мөнгө угаасан, үндэслэлгүй хөрөнгөжсөн, татвар төлөхөөс зайлсхийсэн гэх хэрэгт мөрдөн шалгах ажил явуулахаар  2022 онд улсын Ерөнхий прокурорын тогтоолоор гурван байгууллагын даргын тушаалаар ажлын хэсэг байгуулсан.

       Одоо алын хэсэг хэрэг бүртгэлтийн 25, мөрдөн байцаалтын 11 буюу нийт 36 хэрэгт мөрдөн шалгах ажиллагаа явуулж байна. Ажлын  хэсэг гурван хэргийн мөрдөн шалгах ажиллагааг дуусгаж, яллах дүгнэлт үйлдүүлэхээр прокурорт шилжүүлсэн. Мөн 127 объектод нэгжлэг хийж, хүний бие, баримт бичигт нэгжлэг хийх ажлыг 246 удаа, гэрчээр 421 хүнээс мэдүүлэг авсан байна. Одоогийн байдлаар 66 иргэн, албан тушаалтныг эрүүгийн хэргийн яллагдагчаар татсан бөгөөд 26 хүнийг шүүхийн зөвшөөрөлгүй, хойшлуулшгүй ажиллагаагаар баривчилж, шүүхэд танилцуулсан. Хэргийг шалгах явцад 15 яллагдагчид хэргийн хянан шалгах, таслан сэргийлэх арга хэмжээ авснаас долоон яллагдагч хоригдож байна. Мөн улсын хилээр гаргах эрхийг 19 хүнд хориглож, албан үүргийг түдгэлзүүлэх эрхийг таван хүнд, хувийн баталгаа гаргах, таслан сэргийлэх арга хэмжээг 35 яллагдагчид аваад байна.

     Эрх бүхий албан тушаалтнууд нь 13.8 тэрбум төгрөгийг хахууль болгон авсан байж болзошгүй нөхцөл байдал тогтоогдсон. Хөрөнгө битүүмжлэх шилжилт хөдөлгөөний талаар. Мөрдөн шалгах ажиллагааны явцад одоогоор 81 үл хөдлөх хөрөнгө битүүмжилжээ. Үүнд 78 орон сууц, оффисын гурван талбай байна. 43 тээврийн хэрэгслийн шилжилт хөдөлгөөнийг хязгаарласан.  Мөн 630 сая төгрөг, 230 мянган ам.долларын эх үүсвэрийг судалж байна.

     Хөрөнгийг битүүмжилсэн талаар хоёр жишээ дурдъя. ТӨК-ийн удирдах албан тушаалтнаар ажиллаж байсан этгээд нь Тавантолгой орд газраас хөрс хуулалт, олборлолтын чиглэлээр үйл ажиллагаа байгаа хуулийн этгээдтэй гэрээ байгуулах явцдаа хахууль авч, улмаар Хан-Уул дүүргийн нутаг дэвсгэрт 4.6 га талбай газарт спорт цогцолбор, орон сууцны барилгын ажил эхлүүлж, хахуульд авсан мөнгөөрөө санхүүжүүлсэн нь тогтоогдсон. Мөн Төрийн өмчит компанийн удирдах албан тушаалтнаар ажиллаж байсан этгээд нь найзынхаа нэр дээр Сүхбаатар дүүрэгт нийт 994 мкв талбайтай хоёр оффисыг 5.4 тэрбум төгрөгөөр худалдаж авсан бөгөөд уг оффисоо түрээсэлж 1.9 тэрбум төгрөг олсон нь тогтоогдож байна.  Дээрх албан тушаалтан төмөр замын бүтээн байгуулалтын ажилд найзынхаа компанийг шалгаруулж, санхүүжилтийг нь банк бус санхүүгийн байгууллагаар дамжуулан мөнгө угаасан байж үндэслэл тогтоогдсон. Мөрдөгч нар дээр дурдсан бүх объект, үл хөдлөх хөрөнгийн шилжилт хөдөлгөөнийг хязгаарлаж битүүмжилсэн" гэлээ.