Гэрээсээ гараад сураггүй алга болсон иргэнийг эрэн хайж байна. Тодруулбал, Дорноговь аймгийн Даланжаргалан сумын Олон-Овоо багийн Майхан-Овоогийн хоёрдугаар гудамжны дөрвөн тоотын иргэн Н энэ сарын 21-ний өдрийн 16:00 цагийн орчим гэрээсээ гараад сураггүй болсон тухай дуудлага аймгийн Онцгой байдлын газарт энэ сарын 23-ний өдөр иржээ.

        Дуудлагын дагуу Дорноговь аймгийн Онцгой байдлын газрын Айраг сум дахь Гал түймэр унтраах, аврах 23 дугаар анги, тус сум дахь Цагдаагийн тасгийн алба хаагчид, Даланжаргалан сумын Засаг даргын Тамгын газрын ажилтнууд иргэн Н -ийг тус өдрийн 11:37 цагаас 18:41 цаг хүртэл тус багийн Олон-Овоо, Зөрлөг, Улаан хоршоот, Элдэв-ийн нүүрсний уурхай гэх зэрэг газраар 15 км-ын тойрогт, 169 км газар эрэн хайх ажиллагааг зохион байгуулсан. Мөн өчигдөр Эрчим багийн Хавтгай, Хөшигтийн-Овоо гэдэг газаруудад 15 км-ын тойрогт эрэн хайх ажиллагааг зохион байгуулсан боловч үр дүнд хүрээгүй тул 18:50 цагт түр зогсоосон байна. Өнөөдөр 10:00 цагт эрлийн ажиллагааг үргэлжлүүлнэ.