Нийслэлийн прокурорын газрын Хэрэг бүртгэх, мөрдөн байцаах ажиллагаанд хяналт тавих нэгдүгээр хэлтсийн дарга Б.Мөнх-Од Хөгжлийн банкны хэрэгтэй холбоотой мэдээлэл өглөө.

     Тэрбээр “АТГ, ЦЕГ-ын хамтарсан ажлын хэсэг Хөгжлийн банктай холбоотой хэрэгт мөрдөн шалгах ажиллагаа явуулсан. Ингээд 43 хэрэгт хэрэг бүртгэл нээж, 15 хэрэгт Эрүүгийн хэрэг бүртгэл нээж, яллагдагчаар татсан. Нийслэлийн прокурорын газраас Хөгжлийн банктай холбоотой 463 хавтаст хэрэг буюу 15750 хуудастай хэргийг хянасан байна. Ингэхдээ 72 хүн, гурван хуулийн этгээдэд холбогдох Эрүүгийн хэрэг үүсгэж яллагдагчаар татах тогтоолд өөрчлөлт оруулсан. Ингэхдээ гэмт хэрэгт холбогдсон этгээдийн гэмт хэрэгт хамтран оролцсон байдлыг бүрэн тодорхойлсон учир яллагдагчаар татах тогтоолд өөрчлөлт оруулсан. Хөгжлийн банкны хэрэгт эрх мэдэл, албан тушаалын байдлаа урвуулан ашиглах, мөнгө угаах, хахуул авах, өгөх, нотлох баримт хуурамчаар үйлдэх, санхүүгийн баримт хуурамчаар үйлдэх гэмт хэргийг 80 хүнд холбогдуулан шалгаж байгаа. Тухайлбал, Хөгжлийн банкны Төлөөлөн удирдах зөвлөлийн гишүүн асан Г.Дөлгөөн, Хөгжлийн банкны дэд захирал асан Я.Сод-Эрдэнэ,  Хөгжлийн банкны Эрсдэлийн үнэлгээ удирдлагын газрын хэлтсийн захирлаар ажиллаж байсан Д.Ринчиндорж нарт холбогдох хэргийг прокуророос тусгаарлаж авч үлдсэн талаар олон нийтийн сүлжээгээр гарсан. Үүнтэй холбоотой тайлбар хэлэхэд, Дээрх нэр дурдсан хүмүүс АТГ-ын Мөрдөн шалгах хэлтсээс явуулж буй эрх мэдэл албан тушаалын байдлаа урвуулан ашиглах гэмт хэрэгт Эрүүгийн хэрэг үүсгэж яллагдагчаар татагдсан. АТГ-ын Хөгжлийн банкны хэргийг шалгаж байгаа мөрдөгч дээрх нэр дурдсан хүмүүсийг Эрүүгийн хэргээс тусгаарлах саналыг прокурорт хүргүүлсэн. Ингээд прокурорын газраас Г.Дөлгөөн, Я.Сод-Эрдэнэ, Д.Ринчиндорж нарт холбогдох хэргийг АТГ-ын Мөрдөн шалгах ажиллагааг нэгтгэж, шалгалтын ажлыг үргэлжлүүлж байгаа” гэв.