Гэрээсээ гараад сураггүй болсон зургаан настай хүүхдийг эсэн мэнд олжээ. Тодруулбал, Увс аймгийн Түргэн сумын Баянхайрхан багийн Ихэр гэх газарт  өчигдөр 16:30 цагийн орчим бага насны хүүхэд малаа хотлуулах гэж гэрээсээ гараад сураггүй болсон тухай дуудлагыг тус сумын албан хаагчид хүлээн авчээ. Тодруулбал, Түргэн сумын мэргэжлийн ангийн алба хаагчид, ар гэрийнхэнтэй нь зургаан настай иргэн Б-г эрэн хайх ажиллагааг эхлүүлсэн. Мөн хүч нэмэгдүүлэн ажиллахаар тус аймгийн Онцгой байдлын газрын Эрэн хайх, аврах салбарын алба хаагчид очиж, эрэн хайх ажиллагааг хамтран зохион байгуулж, өнөөдөр 3:00 цагт гэрээс нь баруун урд зүгт 25 км-т Баянхайрхан багийн Индэрт гэх газраас тухайн хүүхдийг төөрсөн явж байхад нь эсэн мэнд олж, ар гэрийнхэнд нь хүлээлгэн өгсөн байна. Одоогоор хүүхдийн биеийн байдал хэвийн байгаа аж.