Хилийн цэргийн 0184 дүгээр ангийн хилчид Сүхбаатар аймгийн Баяндэлгэр, Онгон, Наран, Дарьганга сумын Засаг даргын Тамгын газар, тагнуул, цагдаагийн байгууллагатай хамтран  өвөлжилт хүндэрсэн, цаг агаарын гэнэтийн өөрчлөлтийн үед цасан шуурганд уруудсан малын эрэлд явж буй Дорноговь, Хэнтий, Сүхбаатар аймгийн малчдад туслах, хууль сурталчлах “Зурвас-23” хилийн хамтарсан ажиллагааг явуулсан байна. Тус ажиллагаагаар иргэдэд цаг уурын хүндрэлтэй нөхцөлд эрсдэлээс урьдчилан сэргийлэх талаар зөвлөмж хүргэх, хариулгагүй мал улсын хилд тулах, давахаас урьдчилан сэргийлэх, хилийн болон хил орчмын дэглэмийн биелэлтийг сахиулах зэрэг зөвлөмж танилцуулгыг хийжээ.

             Хилийн хамтарсан ажиллагааны үед улсын хилийн зурвас 12 хэсэг газарт 9700 тооны бод мал цаг агаарын хүндрэл, давагдашгүй хүчин зүйлийн улмаас улсын хилд ойртон бэлчээрлэж байсныг илрүүлэн нутгийн гүн рүү татаж, эздийг нь тогтоон бүртгэлжүүлж, малыг хүлээлгэн өгч иргэдэд учирч болох онц их хэмжээний хохирлоос урьдчилан сэргийлжээ.