Хүүхдийн мөнгөн тэтгэмжийн бүртгэлийн асуудлаар холбогдох яам, агентлагуудаас хэвлэлийн бага хурал хийлээ. Тус хурлын үеэр Хөдөлмөр, нийгмийн хамгааллын яамны Бодлого төлөвлөлтийн газрын дарга А.Хишигбаяр хүүхдийн мөнгөн тэтгэмжээс 113 мянган хүүхэд хасагдах тухай дараах тайлбарыг өглөө. 

 Тэрбээр “Монгол Улсын 2023 оны төсвийн тухай хуулиар хүүхдийн мөнгийг халамжийн хөтөлбөрт багтаасан. Энэ хүрээнд  хүүхдийн мөнгийг нийт хүүхдийн 91 хувьд нь олгох УИХ-ын тогтоол гарсны дагуу бүртгэлийг шинэчилж байна. Өмнө нь хүүхдийн мөнгө гэж 20000 төгрөг өгдөг байсан. Харин цар тахлын үед айл өрхүүдийн амьжиргаа хүндэрч байна гэсэн агуулгаар 2020 оны тавдугаар сараас 100 мянган төгрөг буюу тав дахин нэмэгдүүлж, бүх хүүхдэд олгож эхэлсэн. Хүүхдийн мөнгийг 20 мянга байхад бид 60, 70, 80 хувьд нь өгдөг байсан. Дэлхийн бусад оронд хүүхдийн мөнгийг зорилтод бүлэгтээ өгдөг, нийтээр тараадаг, амьжиргаагаар нь  тогтоодог гэх мэт олон төрлөөр ангилан өгдөг. Цар тахлын нөхцөл байдал харьцангуй гайгүй болсон учир хүүхдийн мөнгийг 100 мянга хэвээр нь зорилтод бүлэг рүү чиглүүлье гэсэн УИХ-ын тогтоол, халамжийн хуультай холбоотойгоор бид нийт хүүхдийн 91 хувьд нь өрхийн амьжиргааг тогтоож олгохоор болсон. Энэ удаагийн аргачлал  маргаан үүсгэж байгаа шалтгаан нь төрд байгаа мэдээллийг авч өрхийн мэдээллийг үнэлж байгаатай холбоотой. Төрд байгаа мэдээллийг Монгол Улс анх удаа энэ ажил дээр ашиглаж байна. Зорилтод бүлэгт орж байгаа хүүхдэд мөнгө олгохгүй байна гэж байхгүй, харин мэдээллээ засуулсны дараа нөхөж олгоно. Монгол Улсын хэмжээнд 0-18 насны хүүхэдтэй өрх 568 мянга байгаа. Үүнээс төрд байгаа мэдээлэлд үндэслэн 78 мянган өрхийн 113 мянган хүүхэд хүүхдийн мөнгө авахгүй буюу есөн хувьд орж хасагдах судалгаа гарсан. ” гэв.